भूकम्प पीडितलाई महासंघले १० करोड राहत बाँड्ने

१६ वैशाख, काठमाडौं । नेपाल उद्योग वाणिज्य महासंघले भूकम्प पीडितहरुलाई १० करोड रुपैयाँ बराबरको राहत (नगद तथा जिन्सी) वितरण गर्ने भएको छ । ‘अपरेशन रिलिफ’ अभियानमार्फत महासंघले देशभरका भुकम्पी पीडितलाई राहत वितरण गर्ने भएको हो ।

महासंघको अगुवाईमा २० भन्दा बढी संघ-संस्था तथा महासंघका सदस्य जिल्ला उद्योग वाणिज्य संघहरुको संयूक्त पहलमा ‘अपरेशन रिलिफ अभियान’ थालनी गरिएको छ ।

यस अभियानमार्फत राहत स्वरुप नगद तथा उपभोग्य वस्तुहरु (खाद्यान्न, औषधि, लत्ताकपडा, पिउने पानी आदि) संकलन गरी प्रभावित क्षेत्रमा पुर्‍याइने छ ।

महासंघले भृकुटीमण्डपमा आफ्नो छुट्टै सचिवालय खडा गरी राहत संकलन कार्य प्रारम्भ गरिसकेको छ । महासंघले भुकम्प पिडीतको सहयोगार्थ एभरेष्ट बैंक, कालीमाटी शाखामा रहेको FNCCI Earth quake Relief Fund, एकाउन्ट नम्वर 03700105200399, (Swift Code- EVBLNPKA_ मार्फत नगद सहयोग गर्न सवैमा आव्हान गरेको छ ।

अपरेशन रिलिफ अभियानमा सम्पूर्ण उद्यमी व्यवसायीहरु, व्यवसायिक घरानाहरु, स्वदेशी एवं विदेशी सहयोगदाताहरु, गैरआवासीय नेपाली समुदायमा महासंघमार्फत भुकम्प पिडीतहरुमा मानवीय भावनाले सहयोग गर्न महासंघले अपिल समेत गरेको छ ।