टीकापुरमा मारिएका एसएसपी न्यौपानेको अन्तिम बिदाइ

८ भदौ, काठमाडौं । कैलालीको टीकापुरमा आन्दोलनकारीबाट मारिएका नेपाल प्रहरीका एसएसपी लक्ष्मण न्यौपानेको प्रहरी सम्मानसहित पशुपति आर्यघाटमा अन्त्येष्टि गरिएको छ ।

मृतक न्यौपानेको सम्मानमा नेपाल प्रहरीको एक टुकडीले शोक सलामी, सम्मान सलामी र अन्तिम सलामी अर्पण गरेको थियो ।

न्यौपानेको शव नेपाली सेनाको हेलिकोप्टरबाट काठमाडौं ल्याइएको थियो । उनको शव गौशालास्थित महानगरीय प्रहरी वृत्तमा अन्तिम श्रद्धान्जलीका लागि राखिएको थियो ।

प्रहरी वृत्त गौशलामा प्रहरी महानिरीक्षक उपेन्द्र कान्त अर्यालसहितका उच्च प्रहरी अधिकारीहरुले न्यौपानेको पार्थिव शरीरमा नेपाल प्रहरीको झण्डा ओढाएर सम्मान गरे ।

एसएसपी न्यौपानेप्रति श्रद्धान्जली दिन उपप्रधान एवं गृहमन्त्री बामदेव गौतम आर्यघाट पुगेका थिए ।

थारु प्रदेशको माग गर्दै कैलालीमा भएको आन्दोलनका क्रममा सोमबार भएको हिंसात्मक झडपमा एसएसपी न्यौपानेसहित सात सुरक्षाकर्मीको मृत्यु भएको थियो । उनका श्रीमती एक छोरा र एक छोरी छन् ।