कुल्चन थालियो सडकको ‘फूलबारी’ (फोटो कथा)

१२ मंसिर, काठमाडौं । राजधानीका सडक किनारामा सार्क सम्मेलनका बेला रोपिएका फूल, दुबो र विरुवाहरु सम्मेलन सकिएको भोलिपल्टैदेखि कुल्चन र माड्न थालिएको छ ।

बबरमहलदेखि तीनकुनेसम्म सडक छेउमा रोपिएको दुबो सर्नै नपाई यात्रुहरुले जथाभावी कुल्चन थालेका छन् । सडकमा बाटो काट्ने ठाउँ कुठाउँबाटै मानिसहरुले बाटो काट्न थालेपछि दुबो र विरुवाहरु बाँच्नै नपाई सुक्ने स्थिति देखिएको छ । यात्रुहरुले जतासुकैबाट बाटो काट्दा पनि ट्राफिक प्रहरीले नियन्त्रण गरेको छैन ।

प्रहरीले यसअघि जथाभावी बाटो काट्नेलाई कारवाही गर्ने र केहीबेर नियन्त्रणमा लिने गरेको भए पनि अहिले त्यस्तो कारवाही गर्ने कार्यक्रम नरेको ट्राफिक प्रवक्ता बसन्तराज पन्त बताउँछन् ।

काठमाडौंको सडक किनारामा राज्यले धेरै रकम खर्च गरेर दुबो र विरुवा रोपेको छ । यसलाई जोगाउन सकियो र विरुवा हुर्किए भने राजधानीको शोभा बढ्न सक्छ । तर, यी विरुवाहरु नहुर्किँदै माडिने खतरा सार्क सम्मेलनको भोलिपल्टदेखि नै बढेको छ ।

कतिपय ठाउँमा यात्रुका लागि बाटो काट्ने ठाउँ राखिएको छैन, जसले गर्दा मानिसहरु कुठाउँबाट दुबो कुल्चेर हिँड्न थालेका छन् ।

तर, सरकारलाई मात्रै गाली गर्ने नागरिकहरुले पनि आफैं सचेत भएर यी कलिला बोट विरुवालाई माया गर्ने हो कि ?