दुखाइ कम गर्ने औषधिले घटाउँछ छालाको क्यान्सर

जिउको दुखाइ कम गर्ने एस्पिरिन तथा आइबुप्रोफेन जस्ता पेनकिलरहरुको नियमित सेवनले छालाको क्यान्सरबाट बचाउन सहयोग गर्ने एक अनुसन्धानले देखाएको छ ।
अस्ट्रेलियाका वैज्ञानिकहरुले गरेको अनुसन्धानले स्टेरोइड मुक्त एन्टीफ्लामेटोरी ड्रग्स -एनएसएआइडिएस) ले सबैभन्दा बढि हुने छालाको क्यान्सर, स्क्वामस सेल कार्सिनोमाको जोखिम १८ प्रतिशतले घटाउने देखाएको छ ।
यसअघि यस्तो पेनकिलरले आन्द्राको क्यान्सर लगायतका क्यान्सरको जोखिम समेत घटाउने पुष्टि भएको थियो ।
जर्नल अफ इन्भेस्टिगेटिभ डर्माटोलोजीमा छापिएको शोध अनुसार छालाको क्यान्सरको जोखिम कम गर्नमा एस्पिरिन सबैभन्दा बढि प्रभावकारी देखिएको छ । एस्पिरिन बाहेकका एनएसएआइडीएस पेनकिलरको सेवनले १५ प्रतिशत जोखिम कम हुने पाइएको छ ।
डाइक्लोफिनेक, आइबुप्रोफेन तथा एस्पिरिन जस्ता पेन किलरमा हुने तत्वले कक्स टू नामक इन्जाइमको उत्पादनलाई कम गर्छ । यो इन्जाइम सरीरमा क्यान्सर कोषिकाहरुको विकाशमा जिम्मेवार मानिन्छ ।
शोधकर्ताहरुका अनुसार क्यान्सरका पूर्व लक्षणहरु देखिइसकेको वा परिवारका अन्य सदस्य तथा अघिल्ला पुस्तामा क्यान्सर रहेको इतिहास भएको अवस्थामा यस्ता पेनकिलरलाई क्यान्सर रोकथाम गर्ने औषधिको रुपमा प्रयोग गर्न सकिने सम्भावना छ ।
तर कतिपय विज्ञहरुले भने पेनकिलरहरुको सेवनले छालाको क्यान्सरको जोखिम घटाउने भन्ने तथ्य सबै हकमा लागु नहुन सक्ने र त्यसमा मानिसको छाला सूर्यको किरणसँग कति सम्पर्कमा आउँछ र पेनकिलरको प्रयोग कति मात्रामा गरिन्छ भन्ने कुराले असर गर्ने बताएका छन् ।
पेनकिलरको अत्यधिक प्रयोगले आन्द्रामा रगत आउने लगायतका साइड इफेक्ट समेत हुने भएकाले निकै सावधानी अपनाउनुपर्ने हुन्छ । त्यसैले पेनकिलरलाई क्यान्सरको औषधिको रुपमै प्रयोग गर्नुभन्दा छालाको क्यान्सरबाट जोगिन नांगो छालालाई घामको प्रत्यक्ष सम्पर्कमा नराख्नु लगायतका सावधानीका उपाय अपनाउनुपर्ने सुझाव विज्ञहरुको छ ।