थारुहरुसँग साइनो नभएका मानिसहरु गएर भड्काए : भीम रावल

८ भदौ, काठमाडौं । नेकपा एमालेका उपाध्यक्ष भीम रावलले टीकापुर घथना नियोजित र बाहृय उक्साहटमा भएको आरोप लगाएका छन् ।

संविधानसभा भवन परिसर बानेश्वरमा पत्रकार सम्मेलन गरेर एमाले नेता रावलले टीकापुर घटनालाई राजनीतिक भन्न नसकिने बताए । उनले भने-थारुहरुसँग साइनो नभएका मानिसहरु गएर भड्काउने काम भएको छ ।’

थारुहरुको जायज माग सम्बोधन गर्न सकिने तर, हिंसा अस्वीकार्य भएको उनले बताएका छन् । अखण्ड सुदूपश्चिमको अडान लिँदै आएका रावलले भने-‘थारुको समानुपातिक राजनीतिक प्रतिनिधित्व सुनिश्चित गर्न कुनै आपत्ति छैन ।’

कैलालीलाई थारु बाहुल्य प्रदेशमा राख्नुपर्ने थारु मागबारे साधिएको प्रश्नमा एमाले उपाध्यक्ष रावलले भने-‘थारु बस्ती रहेको नवपरासीदेखि बर्दियासम्म प्रदेश बनेकै छ, कैलाली कन्चनपूरका थारुले त्यो मागेका छैनन् ।’

सुदूरपश्चिमका १४ जना एमाले सभासदलाई साथमा राखेर पत्रकार सम्मेलन गरेका रावलले राज्य प्रणाली जात र नश्लका आधारमा नभई सिद्धान्तका आधारमा चलने बताए ।

पत्रकार सम्मेलनमा कैलालीकी एमाले थारु सभासद रबनी चौधरी सहभागी भए पनि कन्चनपूरका थारु सभासद कृपाराम राना भने सहभागी थिएनन् ।