प्रधानमन्त्रीले थारु नेतालाई भने- एक दुई दिन हेरौं

२७ भदौ, काठमाडौं । प्रधानमन्त्री सुशील कोइरालाले टीकापुर घटनामा पक्राउ परेका थारु नेताहरुलाई एक दुई दिनमा रिहा गर्ने आश्वासन दिएका छन् ।

सरकारसँग वार्ताका लागि गठित थारुहरुको वार्ता समितिसँग आइतबार बिहान बालुवाटारमा भएको छलफलमा प्रधानमन्त्री कोइरालाले यस्तो आश्वासन दिएका हुन् ।

‘हामीले आफ्ना सातबुँदे मागहरु प्रधानमन्त्रीलाई राख्यौं, उहाँले एक दुई दिन हेरौं, म प्रयास गर्छु भन्नुभएको छ,’ वार्ता समितिका सदस्य अमनलाल मोदीले अनलाइनखबरसँग भने ।

टीकापुर घटनामा गिरफ्तार गरिएका थारु नेताहरुलाई रिहा गर्न आफूहरुले प्रधानमन्त्रीलाई आग्रह गरेको मोदीले बताए । नेताहरुको रिहाइ गर्नेबारे प्रधानमन्त्रीले आश्वासन दिएको उनले बताए ।

थारु नेताहरुले सरकारसँग वार्ताका लागि शनिबार तीन सदस्यीय वार्ता कमिटी गठन गरेका छन् । कमिटीमा राजकुमार लेखी, अमनलाल मोदी र मीनराज चौधरी छन् ।