एन्फा अध्यक्ष गणेश थापालाई फिफाले लगायो १० वर्षे प्रतिबन्ध

३० कात्तिक, काठमाडौं । फिफाले अखिल नेपाल फुटबल संघ (एन्फा)का अध्यक्ष गणेश थापालाई १० वर्षसम्म फुटबलसम्वन्धी कुनै पनि गतिविधिमा संलग्न हुन प्रतिबन्ध गरेको छ ।

थापाले भ्रष्टाचार गरेको तथा घुस लिएकोसहित विभिन्न धाराहरु उल्लंघन गरेको फिफाको अनुशासन समितिको ठहर छ । उसले थापालाई २१ लाख जरिवाना समेत तोकेको छ ।

फिफाको कारबाहीपछि थापा अब स्वत पदमुक्त हुने एन्फाका एक अधिकारीले अनलाइनखबरलाई बताए । फिफाले थापाले घुस लिएको र भ्रष्टाचार गरेको ठहर गरेपछि थापाको सांसद पद समेत खतरामा परेको छ ।

दुई दशकदेखि एन्फा अध्यक्ष रहेका थापा सांसद समेत हुन् । राप्रपा नेपालको सिफारिसमा मन्त्रिपरिषद्बाट सांसद भएका उनी उपपप्रधान एवं परराष्ट्रमन्त्री कमल थापाका भाइ समेत हुन् ।

एन्फा अध्यक्ष २०११ को फिफा चुनावमा गलत काम गरेको, विभिन्न समयमा व्यक्तिगत र पारिवाररिक लाभका लागि रकम लिएको, भ्रष्टाचार गरेको जस्ता अभियोग फिफाले लगाएको छ ।

थापाले भने फिफाले आफूलाई न्याय नगरेको प्रतिक्रिया दिएका छन् । एक विज्ञप्ति जारी गर्दै उनले भनेका छन्-‘फिफाको अनुसाशन कमिटीले मलाई १० वर्षका लागि फुटबलबाट प्रतिवन्ध लगाएको जानकारी पाएँ । म एकदमै निराश छु र मलाई यसमा न्याय भएको जस्तो लाग्दैन ।’

फिफाले गरेको अनुसन्धानमा आफूले हयोग गरेको उल्लेख गर्दै थापाले आफूलाई निर्दोष सावित गर्नका लागि म फिफाका आवश्यक प्रक्रियाहरु अनुशरण गर्ने र आवश्यक परे अदालत जाने बताए ।

थापा यसअघि पनि फिफाको निलम्बनमा परेका थिए । थापाले ५८ करोड भ्रष्टाचार गरेको ठहर गर्दै लेखा समितिले अध्यक्ष पद निलम्बन गरेपछि फिफाले उनलाई १२० दिन निलम्बन गरेको थियो ।

लेखा समितिले कारबाहीका लागि सिफारिस गरेपनि अख्तियारले उनको मुद्धा तामेलीमा राख्यो भने थापा त्यही बेला राप्रपा नेपालको सिफारिसमा मन्त्रिपरिषद्बाट सांसदमा मनोनित भए ।

उनी गत असारमा फेरि एन्फा अध्यक्षमा फर्किए । तर, सोमबार फिफाको अनुशासन समितिले उनीमाथि १० वर्षे प्रतिबन्ध लगाएको छ र उनको फुटबल करियर लगभग सकिएको छ ।