मुआब्जाले बनायो करोडपति

२२ कात्तिक, काठमाडौं । पाथीभरा गाविस–४ का लीलाबहादुर राई हुलाकका पूर्वकर्मचारी हुन् । श्रेणीविहीन उनले गत वर्ष मात्र जागिरबाट अवकाश पाएका थिए ।

केही वर्षयता सपरिवार सदरमुकाम खाँदबारीमै बस्दै आएका उनी गाउँ फर्कने मनस्थितिमा थिएनन् । गाउँमा पाखोबारी त थियो, तर तीन महिना पनि खान नपुग्ने । तर, आज उनी एकाएक करोडपतिमा दरिएका छन् ।

बहुचर्चित अरुण तेस्रो जलविद्युत् आयोजनाले डुबान तथा अन्य कारण अधिग्रहण गर्नुपर्ने जग्गाको मुआब्जा गएको बुधबारबाट वितरण गर्न थालेको छ । पाथीभरामा उनको तीन दाजुभाइको सगोलको २६ रोपनी जग्गा छ । जुन जग्गा डुबानमा पर्ने भयो र जेठा असारमान, माइला शेरबहादुर र उनले मुआब्जा पाउने भएका आजको नयाँ पत्रिकामा समाचार छ ।

आयोजनाले पाखोबारीको प्रतिरोपनी आठ लाख २५ हजारका दरले मुआब्जा दिने भएको छ । त्यस्तै त्योभित्रका रूख, बिरुवा, अलैँची, घर, कटेरोको बेग्लै मूल्यांकन हुने भएको छ । ती सबैको हिसाब गर्दा तीन दाजुभाइले कम्तीमा पनि पाँच करोड पाउने निश्चित भएको छ ।

याफुका टेकबहादुर राईले पनि मुआब्जा वितरण गरेको दोस्रो दिन तीन करोड ७१ लाख रुपैयाँ बुझे । उनी पनि घर–घडेरी र जग्गा जोड्ने ध्याउन्नमा छन् । उनले केही रकम बैंक ब्यालेन्ससमेत गर्ने बताए ।

अरुण तेस्रोको मुआब्जामा भारी रकम पाउन थालेपछि खाँदबारीमा जग्गाको मूल्य आकासिएको छ भने बैंकले पैसा अभाव भएको भन्दै भुक्तानी मागेको जति रकम दिन सकिरहेको छैन ।

अरुण तेस्रोका प्रभावितहरूलाई २९ वर्षपछि मुआब्जा वितरण गरिएको हो । ०४४ सालमा विश्व बैंकको लगानीमा अरुण तेस्रो आयोजना निर्माण हुने तय भएको थियो ।

तुम्लिङटार सभाखोलादेखि आयोजनाको बाँधस्थल नुमको फ्याक्सिदा र पावरहाउस रहने स्थान दिदिङको पुखुवासम्म पुग्ने सडकखण्डअन्तर्गतका बाटोको मुआब्जा भने सोही समयमा वितरण गरिएको थियो । अहिले प्रभावित क्षेत्रमा वितरण गर्न बाँकी मुआब्जा वितरण भएको हो ।