सैनिक अदालतमा पठाएको मुद्दा जिल्ला अदालतमै फर्काउन सर्वोच्चको अन्तरिम आदेश

१४ कात्तिक, काठमाडौं ।सर्वोच्च अदालतले व्यक्ति हत्याको मुद्दा सैनिक अदालतमा पठाउने जिल्ला अदालत चितवनको आदेश कार्यान्वयन नगर्न अन्तरिम आदेश जारी गरेको छ ।

प्रधानन्यायाधीश चोलेन्द्रशम्शेर जबराको एकल इजलासले सैनिक जवानले गैरसैनिक क्षेत्रमा व्यक्ति हत्या गरेकोसम्बन्धी मुद्दा सैनिक अदालतमा नपठाउन आदेश दिएको हो ।

सर्वोच्च अदालतले जिल्ला अदालतको आदेशलाई सदर गर्ने उच्च अदालतको हेटौडा इजलासको आदेश कार्यान्वयनमा पनि रोक लगाएको छ । व्यक्तिहत्या जस्तो घटनामा जिल्ला अदालतमा मुद्दा चलेको अवस्थामा चितवन जिल्ला अदालतले त्यो मुद्दा सैनिक अदालतमा पठाउने आदेश गरेको थियो ।

उक्त आदेशले नियमित फौजदारी न्यायप्रणालीमा अतिक्रमण भएको भन्दै सरकारी वकिल कार्यालयले उच्च अदालतमा अर्को निवेदन दिएको थियो । उच्च अदालतले समेत जिल्लाकै आदेश सदर गरेपछि महान्यायाधिवक्ता कार्यालय रिट निवेदन लिएर सर्वोच्च अदालत पुगेको हो ।

सहकर्मी न्यायाधीश र कानुन व्यवसायीबाट राजीनामाको दबाब खेपिरहेका प्रधानन्यायाधीश जबराले आइतबार उक्त मुद्दामा सुनुवाई गर्दै अन्तरिम आदेश जारी गर्नुका साथै विपक्षीसँग लिखित जवाफ पनि माग गरेका छन् ।

यो पनि पढ्नुहोस् : सेनाले हात हाल्यो, जिल्ला र उच्च अदालतले लत्तो छाडे