![](https://www.onlinekhabar.com/wp-content/uploads/2022/01/bir-bahadur-rana.jpg)
३ माघ, गुल्मी । लुम्बिनी प्रदेशका उर्जा, जलस्रोत तथा सिँचाइ मन्त्री वीरबहादुर रानाले गुल्मी अस्पतालको अनुगमन गरेका छन् ।
अनुगमनको क्रममा सोमबार मन्त्री रानाले निर्माणाधीन गुल्मी अस्पतालसँगै अहिलेको अस्पतालबाट हुने स्वास्थ्य उपचार सम्बन्धमा पनि जानकारी लिएका थिए ।
अस्पतालका मेडिकल सुपरिटेन्डेन्ट डाक्टर उत्तम पच्याले मन्त्री रानालाई समग्र अस्पतालको बारेमा जानकारी गराएका थिए । गुल्मी अस्पतालमा सामाजिक सेवा इकाई मार्फत असहाय गरिबको लागि सेवा भइरहेको पनि पच्याले जानकारी गराए ।
विशेषज्ञ डाक्टरको अभाव भएकोले यसमा ध्यान दिन मन्त्री रानालाई डाक्टर पच्याले आग्रह गरे । आर्थिक अभावमा कोभिड-१९ परिक्षण प्रयोगशाला बन्द भएको र अक्सिजन प्लान्ट गर्न विद्युतीय खर्च बढी भएको डाक्टर उत्तम पच्याले गुनासो गरेका थिए ।
निर्माणधिन गुल्मी अस्पतालको २० प्रतिशत भौतिक काम सकिएको पनि मन्त्री रानालाई जानकारी गराइएको छ । उक्त अस्पताल तोकिएको समयमा निर्माण सम्पन्न गर्न मन्त्री रानाले निर्देशन दिए ।
उक्त अस्पताल राष्ट्रिय पुनर्निर्माण प्राधिकरण केन्द्रीय आयोजना कार्यान्वयन इकाई अन्तर्गतको जिल्ला आयोजना इकाई पाल्पामार्फत भारत सरकारको आर्थिक् सहयोगमा स्वच्छन्द बानियाँ जेभीले काम गरिरहेको छ । मन्त्री रानाले बढ्दो कोभिड संक्रमणलाई नियन्त्रण गर्न विभिन्न कार्यक्रम गर्न अस्पताललाई निर्देशन दिए ।
मन्त्री रानाले कोभिडको संक्रमण व्यापक रुपमा फैलिन नदिन तयारी गरिहाल्न डा. पच्चालाई निर्देशन दिए । उनले गुल्मी अस्पताललाई बिरामी उपचारको लागि आउँदा झन् बिरामी हुने बाताबरण भएको भन्दै स्वच्छ, सफा र आनन्दमय बाताबरण बनाउन आग्रह गरेका थिए ।
गुल्मी अस्पतालको नयाँ भवन बन्दै गरेकाले अहिले पुरानो र जिर्ण भवनबाट सेवा प्रवाह भइरहेको छ । जसले गर्दा अस्पतालको रङ्ग रोगन समेत नहँुदा अलि जिर्ण देखिन्छ ।
मन्त्री राना लुम्बिनी प्रदेशका मुख्यमन्त्री कुलप्रसाद केसीको निर्देशनमा बिशेष गरी गुल्मी अस्पतालको अनुगमन गर्न गुल्मी आएका थिए ।
प्रतिक्रिया 4