पितृशोकमा रहेका संगीतकार आशिष अविरललाई मातृशोक

२ फागुन, काठमाडौं । संगीतकार आशिष अविरललाई बुबाको निधन भएको साता दिन नबित्दै मातृशोक परेको छ । अविरलकी आमा चित्रकुमारी परियारको ७९ वर्षको उमेरमा सोमबार निधन भएको हो ।

गत मंगलबार मात्रै उनका ८१ वर्षीय बुवा बलबहादुर परियारको निधन भएको थियो । बुवाको किरियामा बसेको दोस्रो दिनमा मस्तिष्कघात भएपछि आमालाई उपचारका लागि पोखरा लगिएको थियो । तर उपचारपछि पनि स्वास्थ्यमा सुधार हुन नसकेपछि आइतबार उनलाई बागलुङको गलकोट नगरपालिकास्थित घरमा ल्याइएको थियो ।

अविरलका भाइ कर्णका अनुसार बुवाआमा दुर्वमा उच्च रक्तचापको समस्या देखिएको र त्यसले मस्तिष्कघात निम्त्याएको बताए । चित्रकुमारीको सोमबार नै स्थानीइ गौंदीघाटमा अन्त्येष्टि गरिएको छ । उनका दुई छोरा र तीन छोरी छन् ।