माओवादी केन्द्रको केन्द्रीय समिति बैठक १ बजे सारियो

२० फागुन, काठमाडौं । आज ११ बजेका लागि तय भएको नेकपा (माओवादी केन्द्र)को केन्द्रीय समिति बैठक १ बजेका लागि सेको छ ।

राष्ट्रिय सभागृहमा बस्ने बैठक दिउँसो १ बजे सारिएको माओवादी नेताहरूले बताएका छन् । बैठक तीन दिनसम्म चल्ने छ ।

समसामयिक राजनीति, स्थानीय तह निर्वाचनको तयारी र सांगठनिक विषयमा बैठकमा छलफल गर्नका लागि माओवादी बैठक बस्न लागेको हो ।

केन्द्रीय समितिको बैठकबाट बाँकी केन्द्रीय सदस्यहरुको मनोनयन, पोलिटब्युरो, स्थायी समिति र पदाधिकारी चयन गर्ने तयारी छ ।

गत पुसमा आयोजित आठौं राष्ट्रिय महाधिवेशनले केन्द्रीय सदस्यमात्र चयन गरेको थियो । तिनै केन्द्रीय सदस्यहरुको पहिलो बैठकले अध्यक्षमा प्रचण्डलाई निरन्तरता दिने निर्णय गरेको थियो ।

विधान अनुसार पदाधिकारीमा एक जना अध्यक्ष, एक जना वरिष्ठ उपाध्यक्ष, ६ जना उपाध्यक्ष, एक जना महासचिव, दुई जना उपमहासचिव, तीन जना सचिव र एक जना कोषाध्यक्ष रहनेछन् ।

महाधिवेशनबाट अनुमोदित विधानमा २९९ केन्द्रीय सदस्य हुने भनिए पनि माओवादीले ६३ जना केन्द्रीय सदस्यहरु मनोनीत गर्न बाँकी छ ।