चैतमै नदीमा पानीको सतह बढ्यो, विद्युत् उत्पादन दोब्बर

२० चैत, काठमाडौं । यो वर्ष चैत महिनामै अनपेक्षित रुपमा नदीहरुमा पानीको सतह बढेको छ । जसले जलविद्युत् आयोजनाहरुको उत्पादन पनि बढ्न पुगेको छ ।

नेपाल विद्युत प्राधिरकणका प्रवक्ता तथा भारप्रेषण केन्द्रका प्रमुख सुरेशबहादुर भट्टराई धेरै वर्षपछि चैत महिनामै बिजुलीको उत्पादन अहिलेसम्मकै आयोजनाहरुमा उच्च रुपमा बढेको हो ।

‘यो वर्ष हिमालका तल्ला भेगमा बाक्लो हिमपात भएको थियो, अहिले गर्मी बढेकाले त्यो हिउँ छिट्टै पग्लिएको हुनसक्छ,’ उनले भने, ‘विशेषगरी हिमनदीमा आधारित प्राधिकरणका आयोजनाहरुबाट हुने उत्पादन गत वर्षहरुको चैतको भन्दा दोब्बर छ ।’

तर, यो बहाव कति दिनसम्म कायम रहन्छ भन्ने निश्चित नरहेको उनले बताए । उनका अनुसार गत वर्षहरुमा चैतमा ५८ मेगावाट प्रतिघण्टा उत्पादन दिने ‘कालीगण्डकी ए जलविद्युत आयोजना’ले अहिले करिब १२० मेगावाट आवर प्रतिघण्टामा पुगिसकेको छ ।

त्यसैगरी मध्यमर्स्याङ्दीले विगतका चैतमा २८ मेगावाट प्रतिघण्टासम्म बिजुली दिने गरेमा अहिले ५७ मेगावाट प्रतिघण्टाभन्दा माथि पुगेको छ ।

‘तामाकोसीले १२० मेगावाट प्रतिघण्टा उत्पादन हुने अनुमान गरिएकोमा १५२ मेगावाट प्रतिघण्टासम्म उत्पादन दिइरहेको छ,’ उनले भने । मर्स्याङ्दी, माथिल्लो त्रिशूली थ्री ए, चमेलिया, त्रिशूली, सुनकोशी जस्ता आयोजनाहरुबाट हुने उत्पादन विगतका चैतमा भन्दा करिब दोब्बर भएको छ ।

अस्वभाविक रुपमा नदीको सतह बढेपछि उत्पादन बढ्दा प्रााधिकरणलाई राहत भएको छ । वैशाखपछि हिमालको माथिल्लो भेगमै हिउँ पग्लिन थाल्ने भएकाले अब फेरि नदीमा पानीको सतह नघट्ने अपेक्षा प्राधिकरणको छ ।

आयोजनाहरुबाट उत्पादन बढेपछि प्राधिरकणले उद्योगहरुमा बिजुली कटौती गर्न बन्द गरेको छ । प्रवक्ता भट्टराईका अनुसार विद्युत आपूर्ति शत प्रतिशत गर्न थालिएको छ ।

गत हप्ता भारतबाट विद्युत् किन्न नसकेपछि प्राधिकरणले उद्योगहरुमा बिजुली कटौती थालेको थियो । भारतबाट आयात हुने बिजुली महँगिएपछि प्राधिरकणले भारतमा बिजुली किन्न गरेको बोलकबोल पर्न छाडेको थियो ।

अब भने आन्तरिक उत्पादनबाटै अधिकतम माग धान्न सकिने अवस्था आएको प्राधिकरणका अधिकारीहरु बताउँछन् । ‘साँझको पिक आवरमा केही समय भोल्टेज व्यवस्थापन गर्न कतै–कतै उद्योगहरुमा सामान्य कटौती हुनसक्छ,’ भट्टराई भन्छन्, ‘अहिले उद्योगमा कतै पनि विद्युत् काट्नुपर्ने अवस्था छैन ।’