आयोगले बढायो एमबीबीएस अध्ययनको शुल्क

१७ जेठ, काठमाडौं । चिकित्सा शिक्षा आयोगले शैक्षिक सत्र २०७८/७९ का लागि चिकित्सा शिक्षाका विभिन्न विषयको शुल्क वृद्धि गरेको छ ।

मंगलबार बसेको आयोगको बैठकले हाल कायम रहेको शैक्षिक शुल्कमा ३.६ प्रतिशतले वृद्धि गर्ने निर्णय गरेको सदस्य सचिव डा.भोजराज काफ्लेले जानकारी दिए ।

गत सालको समग्र मूल्य वृद्धिलाई आधार मानेर शुल्क निर्धारण गरिएको सदस्य सचिव डा.काफ्लेले बताए । उनले भने ‘हामीले गत वर्षको मुद्रास्फीति प्रतिशतलाई आधार मानेर शुल्क निर्धारण गर्ने निर्णय गरेका छौं ।’

शैक्षिक सत्र २०७७/७८ मा आयोगले एमबीबीएस अध्ययनका लागि उपत्यकाभित्रका मेडिकल कलेजमा ४० लाख २३ हजार २५० रुपैयाँ शुल्क तोकेको थियो ।

तर चालु शैक्षिक सत्रमा ४१ लाख ६८ हजार ८७ रुपैयाँ पुगेको छ । उपत्यका बाहिरको मेडिकल कलेजमा एमबीबीबएस अध्ययनको शुल्क ४४ लाख ३६ हजार २५ रूपैयाँबाट बढेर ४५ लाख ९५ हजार ७२१ रुपैयाँ पुगेको छ ।

त्यस्तै बीडीएसका लागि गत शैक्षिक सत्रमा २० लाख १९ हजार ५८० शुल्क तोकिएकोमा यो शैक्षिक सत्रमा बढेर २० लाख ९२ हजार २८४ पुगेको छ । बीएससी नर्सिङ कार्यक्रमको लागि गत शैक्षिक सत्रमा विद्यार्थीले १० लाख शुल्क तोकिएकाेमा यस वर्ष बढेर १० लाख ३६ हजार रुपैयाँ पुगेको छ ।

हेर्नुहोस् शुल्कको सूची

कार्यक्रम	बढेको शैक्षिक शुल्क
एमबीबीएस (उपत्यका भित्र)	४१,६८,०८७
एमबीबीएस (उपत्यका बाहिर)	४५,९५,७२१
बीडीएस	२०,९२,२८४
बीएससी नर्सिङ	१०,३६,०००
बीपीटी/बीएससी एमएलटी/ बीएससी एमआईटी/बीएससी मेडिकल माईक्रोबायोलोजी/बायोकेमेस्ट्री	७,७७,०००
बीएएमएस	११,३१,९३३
बीएनएस एन्ड पीबीएन	५,१८,०००
बी फार्मा/बीपीएच/बीओपीटीएम/बीएएसएलएपी	७,७७,०००
एमडी/एमएस क्लिनिकल	२३,८१,७६४
एमडी/एमएस बेसिक साईन्स	१०,८५,८६७
एमडीएस क्लिनिकल	२३,८१,७६४
एमडीएस बेसिक साईन्स	१०,८५,८६७
एमडी आयुर्वेद	९,५७,६४२
एमएन/एमएससी नर्सिङ/एमपीएच	९,२०२२७
एम फार्मा	५,१९६५७
एम.एससी मेडिकल/माईक्रोबायोलोजी/बायोकेमेस्ट्री/एमएससी एमआईटी/एमएलटी	७,५७,८३४
एमएससी बेसिक साईन्स	७,५७,८३४
एम फील क्लिनिकल साईकोलोजी	३,०४,२१६
डीएम/एमएचसी	२५,९०,०००