उद्योग वाणिज्य संघ पोखरामा पोखरेल र प्रजापति प्यानलसहित भिड्ने

पत्रकार सम्मेलनमा अर्जुनकुमार पोखरेल आफ्नो टिम घोषणा गर्दै ।

९ भदौ, पोखरा । पोखरा उद्योग वाणिज्य संघको नयाँ नेतृत्वका लागि २४ र २५ भदौमा अधिवेशन हुँदैछ । अधिवेशनका लागि हालका उपाध्यक्ष (वाणिज्य) अर्जुन पोखरेल र वरिष्ठ उपाध्यक्ष पवन प्रजापति प्यानलै घोषणा गरेर चुनावी मैदानमा उत्रिएका छन् ।

पोखरेलले यसअघि २२ साउनमा पत्रकार सम्मेलन गर्दै आसन्न निर्वाचनमाविना प्यानल नै अध्यक्ष उठ्ने घोषणा गरेका थिए । ६ भदौमा उनले प्यानलसहित अध्यक्ष घोषणा गरेका थिए ।

अध्यक्षमा प्यानलसहित भिड्न लागेका दुवैजना नेपाली कांग्रेस निकटमात्रै मानिंदैनन्, लामो समय एकै समूहमा रहेर संघको कार्यसमितिको अनुभव लिइसकेका छन् । तर, ३४ औं अधिवेशमा दुवै अलगमात्रै भएनन्, प्यानलै बनाएर चुनावी मैदानमा उत्रिएका छन् । यसअघिका ४ वटा उद्योग वाणिज्य संघका चुनावमा एउटै प्यानलमा थिए ।

६ भदौमा पवनले गरेको पत्रकार सम्मेलनमा यस पटक पनि अर्जुनलाई आफ्नै प्यालनमा समेटेर आफूले नेतृत्व लिने योजना बनाए पनि त्यसमा सहमति जुट्न नसकेको बताएका थिए ।

‘अध्यक्षलगायत सबै पदमा सर्वसम्मति गर्ने भन्ने थियो । त्यसका लागि पूर्वअध्यक्षसहित वार्ता पनि बसियो,’ उनले भनेका थिए, ‘तर, वार्तामा बस्दा सहमति जुट्न सकेन । त्यही भएर छुट्टै प्यानल घोषणा गर्नुपर्‍यो ।’

व्यवसायीका अनुसार सुरुमा अर्जुन पोखरेलले आफू वरिष्ठ उपाध्यक्ष पदमा रहेर अध्यक्षमा प्रजापतिलाई स्वीकार्न तयार भएका थिए । तर, प्रजापतिले वरिष्ठमा अर्को व्यक्तिलाई बनाउने भएपछि उनी बिच्किएका हुन् । स्रोतका अनुसार केही पूर्वअध्यक्षहरुको सल्लाहअनुसार वरिष्ठ उपाध्यक्षमा गोकर्ण कार्कीलाई अघि सारेपछि अर्जुन पवनसँग टाढिएका हुन् ।

पोखरेलले आफू वरिष्ठ उपाध्यक्ष निर्विरोध हुनुपर्ने नभए सोही पदमा आफ्नो प्रतिद्वन्द्वी कार्की नहुनुपर्ने माग राखेका थिए । तर, उक्त माग सम्बोधन गर्न प्रजापति समूह तयार भएन । प्रजापतिले घोषणा गरेको प्यानलमा समेत वरिष्ठ उपाध्यक्षमा कार्कीलाई नै अघि सारेका छन् । उनले सदस्यहरुको नाम भने घोषणा गरेका छैनन् । ‘उम्मेदवारी दर्ता गर्दासम्म सदस्यहरुको टुंगो लागिसक्छ’ उनले भने ।

प्रजापतिले वरिष्ठ उपाध्यक्षमा अघि सारेका कार्की र अध्यक्षमा उम्मेदवारी घोषणा गरेका पोखरेल अघिल्लो अधिवेशनमा फरकफरक समूहबाट चुनावी मैदानमा उत्रिएका थिए । कार्कीले उद्योगतर्फको उपाध्यक्षमा पदमा प्रजापति समूहकै उम्मेदवार चिनु गुरुङलाई हराएका थिए । आफ्नै प्यानलका उम्मेदवारलाई पराजित गर्ने फरक प्यानलका कार्कीलाई अहिले प्रजापतिले वरिष्ठ उपाध्यक्ष दिने भएपछि पोखरेल असन्तुष्ट बनेका हुन् ।

यता, अधिवेशन भन्दा एक महिना अघि नै अध्यक्षमा एकल उम्मेदवारी घोषणा गरेका पोखरेलले आफूले कुनै बार्गेनिङ नगरेको र प्यानल पनि नबनाउने दाबी गरेका थिए । प्यानल बनाउँदा राजनीति घुस्ने भन्दै उनले भनेका थिए, ‘मेरो उम्मेदवारी कुनै बार्गेनिङ होइन । प्यानल पनि बनाउँदिन । प्यानल बनाउँदा राजनीति घुस्छ । चुनाव एक्लाएक्लै लड्ने हो ।’

तर, पोखरेलले पनि बिहीबार आफ्नो प्यानलनै घोषणा गरेका छन् । उनले अर्को समूहले आफ्नो टिम बनाउँदा संघको नेतृत्व लिन सक्ने सक्षम व्यवसायीलाई छुटाइएकाले घोषणा गर्नुपरेको दाबी गरे । ‘पछि सहमति खोज्दा पनि सबैलाई निषेध गरियो । निषेधको राजनीति गरिएपछि प्यानल घोषणा गर्न बाध्य भयौं,’ उनले भने, ‘अनुभवी र सक्षम साथीहरु पनि छुट्नुभयो ।’

पत्रकार सम्मेलनमा पवन प्रजापति आफ्नो टिम घोषणा गर्दै ।

प्यानल घोषणा गर्दै अध्यक्ष प्रत्याशी प्रजापतिले पोखरेल अझै सहमतिमा आउन चाहे आफूहरु मिल्न तयार रहेको बताएका थिए । तर, पोखरेलले भने त्यो सम्भावना अब नरहेको बताएका छन् ।
अध्यक्ष प्रत्याशी प्रजापति संघको २ पटक कार्यसमिति सदस्य र कोषाध्यक्ष, उपाध्यक्ष तथा वरिष्ठ उपाध्यक्षमा एक/एक कार्यकालको अनुभव लिइसकेका छन् । अर्का प्रत्याशी पोखरेलसँग कार्यसमिति सदस्य, उपमहासचिव, महासचिव उपाध्यक्षमा एकएक कार्यकालको अनुभव छ ।

को-को छन्, प्रजापति प्यानलमा ?