कीर्तिमानी बुवाको पाइला पछ्याउँदै स्क्वासमा अमृतको ‘ह्याट्रिक’ जित

३१ असोज, पोखरा । नेपाली खेलकुद जगतमा एक दुर्लभ उदाहरण हुन्, स्क्वासका हिराबहादुर थापा । जसले आफ्नो खेल जीवनमा कहिल्यै दोस्रो हुनु परेन, लगातार १७ पटक राष्ट्रिय च्याम्पियन बने ।

लगातार लामो समय अविजित रहँदै थापाले २०७३ मा खेल जीवनबाट सन्यास लिए । तर, स्क्वासबाट टाढा भागेनन्, हाल उनी राष्ट्रिय टिमका प्रशिक्षक छन् ।

तिनै थापाको पदचाप पछ्याउँदै उनका छोरा अमृत थापामगर अगाडि बढिरहेछन् ।

अमृतले नवौं राष्ट्रिय खेलकुदअन्तर्गत पोखरा रंगशालामा सोमबार भएको पुरुष एकल स्क्वास प्रतियोगितामा स्वर्ण पदक हात पारे । राष्ट्रिय खेलकुदमा योसँगै उनी तेस्रो पटक च्याम्पियन बनेका छन् । यसअघि उनले सातौं र आठौंमा पनि स्वर्ण पदक पहिरिएका थिए ।

गोखरामा जन्मिएका अमृत ललितपुरमा बस्छन् । थापाको घरबाट नजिकै रहेको स्क्वास कोर्ट नै उनको बाल्यकालको खेलमैदान भयो । राष्ट्रिय च्याम्पियन बाबुको पछिपछि लागेर स्क्वास कोर्ट धाउँदाधाउँदै उनी लगातार तेस्रो पटक राष्ट्रिय च्याम्पियन बन्ने भए ।

‘हुन त म पाँचौं राष्ट्रियदेखि नै खेल्न थालेको हुँ । तर, त्यतिबेला म सानो पनि थिएँ, एक्स्पेरियन्स पनि थिएन । त्यस्तो ठूलो अचिभमेन्ट भएन,’ तेस्रो पटक स्वर्ण जितेको खुसी साट्दै उनले भने ‘छैठौंमा एसएलसीसीको होस्टेलमा भएर खेल्न पाइनँ, त्यसपछि कन्टिन्यू थ्री टाइम्स गोल्ड मेडलिस्ट बनें ।’

लगातार राष्ट्रिय च्याम्पियन बनिरहेका अमृतका बुवाले सन्यास लिएकै वर्ष भएको सातौं राष्ट्रिय खेलकुदमा नै उनले पहिलो पटक स्वर्ण पदक हात पारेका थिए । ‘बुवा १७ पटकसम्म लगातार नेशनल च्याम्पियन बन्नुभो, बुवापछि मैले नै लिएको हुँ,’ उनले सुनाए ।

अमृत सन् २०१५–१६ मा २–३ वटा प्रतियोगितामा त बुवासँगै पनि सँगै भिडेका थिए । ती सबै प्रतियोगिता पनि उनकै पोल्टा पर्‍यो । अमृतले हराउन थालेपछि नै हिराबहादुरले सक्रिय खेल जीवनबाट सन्यास लिएका हुन् भन्ने पनि छन् । तर थापा भन्छन्, ‘यसलाई खोसेको भन्ने कि के भन्ने ? तर, उहाँपछि म नै च्याम्पियन भइराखेको छु ।’

थापाले सोमबार फाइनलमा पराजित गरेका बागमती प्रदेशका अरहन्तकेशर सिम्ह उनका नयाँ प्रतिद्वन्द्वी भने थिएनन् । उनीहरु सातौं राष्ट्रिय खेलको फाइनलमा आमनेसामने भइसकेको थिए । संयोगले दुवै खेल अमृतले नै जिते ।

‘उसले (अरहन्त) अरु टुर्नामेन्ट जितिराखेको थियो । युकेमा खेलिराखेको भएर उसको गेम्स एक्स्पेरिन्स धेरै छ । हामी होमग्राउन्डमा खेलेको भएर म्याच एक्स्पेरिन्स पनि कम भएको हो,’ अमृत भन्छन्, ‘ऊ मेन्टल्ली बलियो भए पनि म फिजिकल्ली बलियो थिएँ ।’

अमृतले साउथ एसियन गेम्स, एसियन गेम्स खेलिसकेका छन् । तर, राज्यबाट जुनसुकै खेल पनि बेवास्तामा परेको अमृतको गुनासो छ । ‘सरकारकातर्फबाट खासै सहयोग छैन । सबै खेलमा उस्तै समस्या होला,’ भन्छन्, ‘मेनमेन, टुर्नामेन्ट हुँदा सर्टेन टाइमका लागि हुन्छ । तर, अरुबेला कसैको पनि केही थाहा हुँदैन ।’

उमेरले २६ औं वसन्तमा हिँडिराखेका अमृत अझै १० वर्ष स्क्वासमै रमाउन चाहन्छन् । ‘अझै १० वर्षजति खेल्छु । त्यतिबेलासम्म इन्टरनेशन लेभलसम्म नै पुग्ने लक्ष्य छ ।’ बुवामात्रै नभएर अमृतको परिवारमा उनको दिदी पनि स्क्वासकै खेलाडी हुन् । दिदी कृष्णा थापा पनि नवौं राष्ट्रिय खेल्न मैदानमै छिन् ।

कहिलेकाहीं कीर्तिमानी बुवाको राष्ट्रिय कीर्तिमान तोड्छु भन्ने लाग्छ कि लाग्दैन ? जवाफमा अमृत भन्छन्, ‘मनमा त हुन्छ । गर्न सकिन्छ सकिँदैन थाहा छैन । तर, सोच त्यही छ ।’