माओवादीको घोषणा : २०८४ को चुनावमा विदेशबाट भोट दिने व्यवस्था

१४ कात्तिक, काठमाडौं । नेकपा माओवादी केन्द्रले आउँदो स्थानीय चुनावमा विदेशबाटै भोट हाल्न पाउने व्यवस्था गर्ने प्रतिवद्धता जनाएको छ ।

सोमबार सार्वजनिक माओवादी केन्द्रको घोषणापत्रमा लेखिएको छ, ‘आगामी स्थानीय निर्वाचनसम्म विदेशमा रहेका नेपालीहरुले आफू कार्यरत मुलुकबाटै मतदान गर्न पाउने व्यवस्था गरिनेछ ।’

हरेक ५ वर्षमा हुने स्थानीय तहको अर्को निर्वाचन अब २०८४ मा हुनेछ ।

सर्वोच्च अदालतले ०७४ मा विदेशमा बस्ने नेपालीलाई पनि मतदानको अधिकार दिन सरकारका नाममा आदेश दिएको थियो । २०३७ सालको जनमत संग्रहमा विदेशमा रहेका नेपालीले पनि भोट हालेका थिए । तर हाल विदेशमा रहेकाहरुले मतदान गर्न पाउँदैनन् । विदेशमा रहेका नेपालीले भने आफूहरुले पनि मत दिन पाउने व्यवस्था गर्न माग गर्दै आएका छन् ।