विश्वकप १९७० : फुटबलमा आधुनिकताको सुरुवात

३० कात्तिक, काठमाडौं । उत्तर अमेरिकी देशले पहिलोपल्ट विश्वकप आयोजना अधिकार पाएको थियो । ६ वटै महादेशले प्रतिनिधित्व गरेको यो पहिलो विश्वकप थियो । यसअर्थमा वास्तविक विश्वकप यहाँबाट सुरुभयो ।

फिफाले अफ्रिका र एसियालाई कोटा छुट्यायो । यो उनीहरुको लामो समयदेखिको माग थियो । एल साल्भाडोर, इजरायल र मोरक्को प्रतियोगिताका लागि पहिलोपल्ट छनोट भए ।

राजनीतिक तिक्तता र सम्भावित बहिस्कारलाई ध्यानमा राख्दै मोरक्को र इजरायललाई फरक फरक समूहमा राखियो ।

यो विश्वकपदेखि फुटबलमा आधुनिकताको सुरुवात भएको हो । यही संस्करणबाट पहेँलो र रातो कार्डको प्रयोग सुरु भयो । यही संस्करणदेखि खेलमा सब्स्टिच्युडको व्यवस्था सुरु गरियो । त्यतिबेला एक खेलमा एउटा टिमले बढीमा दुई खेलाडी सब्स्टिच्युड गर्न पाउँथे ।

विश्वकपमा पहिलोपल्ट आधिकारिक म्याच बलको प्रयोग भयो । टेल्स्टार नाम दिइएको सो म्याचबल एडिडास कम्पनीले उत्पादन गरेको थियो ।

मेक्सिकोका पाँच शहरमा प्रतियोगिता विस्तार गरिएको थियो । राजधानी मेक्सिको सिटीमा अवस्थित स्टेडियम आज्टेकामा फाइनल खेल आयोजना गरिएको थियो । सो रंगशालाको दर्शक क्षमता १ लाख हो । तर, फाइनलमा १ लाख ७ हजार ४१२ जनाको उपस्थिति रहेको आधिकारिक तथ्यांक छ ।

यो पनि पढ्नुहोस

जिओफ हर्स्ट : विश्वकप फाइनलमा ह्याट्रिक गर्ने एक्लो खेलाडी

आफ्नो उच्च स्कोरिङ खेल र आक्रामक शैलीका कारण १९७० को विश्वकपमा ब्राजिल टिमलाई इतिहासकै महान टिम मानिएको थियो । ब्राजिल टिमले सबै ६ खेल जितेर १२ वर्षको अन्तरमा तेस्रोपल्ट विश्वकप उपाधि भित्र्याउँदा १९ गोल गरेको थियो ।

यो पेलेको अन्तिम विश्वकप थियो । उनले फाइनलमा आफ्नो महानताको छाप छोड्न सके । उनले ब्राजिलका लागि पहिलो गोल गरे भने तेस्रो र चौथो गोलमा असिस्ट गरे । ब्राजिलले इटलीलाई ४–१ ले हराएर उपाधि उचालेको थियो ।

तीनवटा विश्वकप जितेपछि ब्राजिलले जुलेस रेमिट ट्रफी आफैंले राख्न पाउने भयो । सन् १९७४ को विश्वकपका लागि नयाँ ट्रफी (अहिलेको) निर्माण गरिएको हो ।

यो विश्वकप पहिलोपल्ट रंगीन पर्दामा प्रत्यक्ष प्रशारण गरिएको थियो । विश्वकपका हरेक खेलहरु औषतमा ५० हजार व्यक्तिले हेरेका थिए । यसलाई विश्वकपकै सबैभन्दा महान संस्करण भनिन्छ किनभने यसपल्ट ब्राजिलले तेस्रोपल्ट विश्वकप जितेको थियो भने शताब्दीकै महान पेलेले अन्तिमपल्ट खेलेका थिए ।

ब्राजिलका जेयर्जिन्होलाई ‘विश्वकप हुरिकेन’को उपनाम दिइएको थियो । उनले आफू समावेश भएर ब्राजिलले खेलेका सबै खेलमा गोल गरेका थिए ।

युरोपको सहज समयमा प्रत्यक्ष प्रशारण गर्न भन्दै मेक्सिकोको चर्को गर्मीमा मध्याह्नको समयमा विश्वकपका खेलहरु सन्चालन गरिएको थियो ।

तथ्यांकमा विश्वकप १९७०

आयोजकः मेक्सिको
टिमः १६
फम्र्याटः समूह चरण, नकआउट
खेलः ३२
गोलः ९५
विजेताः ब्राजिल
उपविजेताः इटली
गोल्डेन बुटः गर्ड मुलर (पश्चिम जर्मनी)