विश्वकप १९८२ः पहिलाेपल्ट २४ टिम सहभागी, अर्जेन्टिनाका लागि बिर्सनलायक

३ मंसिर, काठमाडौं । सन् १९८२ मा फिफाले सहभागी टिमको संख्या १६ बाट बढाएर २४ बनायो । स्पेनले पहिलोपल्ट आयोजना अधिकार पाउँदा १४ शहरको १७ रंगशालामा विश्वकपका खेल सन्चालन गरिए ।

चार वर्षअघि अर्जेन्टिनाले घरेलु मैदानमा पहिलो विश्वकप उपाधि जितेको थियो । उनीहरु युवा सुपरस्टार म्याराडोनाको भरोसामा थिए । तर, अर्जेन्टिनी टिमले समूह चरण पार गर्न सकेनन् ।

यो विश्वकपमा ब्राजिलले आक्रामक फुटबलको नमूना प्रस्तुत गरेको थियो । उनीहरुका स्टार खेलाडीहरु जिको, फाल्काओ र सोक्रेट्सले शानदार प्रदर्शन गरेका थिए । तर, इटलीसँग पराजित भएपछि उनीहरु सेमिफाइनलसम्म पुग्न सकेनन् ।

पहिलोपल्ट विश्वकपका लागि छनोट भएको अल्जेरियाले तत्कालीन युरो च्याम्पियन पश्चिम जर्मनीलाई हराएर अहिलेसम्मकै सबैभन्दा ठूलो सफलता निकाल्न सक्यो । अल्जेरियाले चिलीमाथि पनि ३–२ को जित पश्चिम जर्मनीले अस्ट्रेलियामाथि निकै नै विवादास्पद जित हासिल गर्दा अल्जेरिया दोस्रो चरणमा पुग्न सकेन ।

पश्चिम जर्मनीले एक वा दुई गोलसम्मको जित हासिल गरेको खण्डमा दुवै टिम दोस्रो चरणमा पुग्ने समीकरण बनेको थियो । पूर्व विश्व च्याम्पियन जर्मनीले दशौं मिनेटमै अग्रता लिएको थियो । त्यसयता खेल अवधिभर दुवै टिमले आक्रमणको प्रयास नै गरेनन् । विश्वकपमा अहिलेसम्म पनि त्यो खेललाई अघोषित मिलेमतोका रुपमा लिने गरिन्छ ।

प्रतियोगितामा अल्जेरियाका अलावा क्यामरुन, होण्डुरस, कुवेत र न्युजिल्याण्डले पनि पहिलोपल्ट सहभागिता अवसर पाएका थिए । अफिसियलबाट पक्षपातको आरोप लागे पनि आयोजक स्पेन पहिलो चरणबाट माथि जान सकेन ।

फाइनलमा पूर्व च्याम्पियनहरु इटली र पश्चिम जर्मनी आमने सामने भएका थिए । पाउलो रोसीले सो विश्वकपमा आफ्नो छैटौं गोल गरी इटलीलाई तेस्रोपल्ट विश्वकप उपाधि दिलाए । फाइनलमा रोसीका अलावा मार्को टार्डेली र अलेसान्द्रो अल्टोबेलीले पनि गोल गरेका थिए । जर्मनीका लागि पाउल ब्रेटनरले ८३औं मिनेटमा सान्त्वना गोल फर्काएका थिए ।

यो विश्वकपदेखि बराबरीको नतिजाबाट विजेता छुट्याउन पेनाल्टी शुटआउटको सुरुवात भएको हो । अतिरिक्त समयपछि पेनाल्टीको व्यवस्था गरियो । हंगेरीले एल साल्भाडोरमाथि १०–१ गोलअन्तरको जित विश्वकप इतिहासकै सबैभन्दा फराकिलो नतिजा हो ।

फकल्याण्डको युद्धका कारण ब्रिटिस देशहरुले बहिस्कारको चेतावनी दिएका थिए । यद्यपी उनीहरुले अन्तिम समयमा सहभागी हुने निर्णय लिए ।

तथ्यांकमा विश्वकप १९८२

आयोजकः स्पेन
टिमः २४
फर्म्याटः समूह चरण, दोस्रो चरण, फाइनल
खेलः ५२
गोलः १४६
विजेताः इटली
उपविजेताः पश्चिम जर्मनी
गोल्डेन बुटः पाउलो रोसी (इटली)