पोखरा विमानस्थलमा पार्किङ शुल्क कसरी भयो तेब्बर ?

१६ माघ, पोखरा । पोखरा अन्तर्राष्ट्रिय विमानस्थलमा पुरानो विमानस्थलमा भन्दा तेब्बरसम्म बढी सवारी पार्किङ शुल्क तिनुपरेपछि अहिले विरोध भइरहेको छ छ । तेब्बरमात्रै होइन, घन्टैपिच्छे पटके शुल्क तिर्नुपर्दा मारमा परेको कामविशेषले विमानस्थल जानेहरु बताउँछन् ।

पुरानो पोखरा विमानस्थलमा १० रुपैयाँमा पार्किङ गरेका २ पांग्रे सवारी धनीले अहिले नयाँ विमानस्थलमा ३० रुपैयाँ बुझाउनुपर्नेछ । प्रवेश गर्दा ६० रुपैयाँ शुल्क तिर्नुपरेपछि ट्याक्सीचालकले यो रकम यात्रुसँग उठाउन थालेका छन् ।

पुस १७ गतेदेखि सञ्चालनमा पोखरा अन्तर्राष्ट्रिय विमानस्थलबाट भने हालसम्म आन्तरिक उडानमात्रै भइरहेको छ । आन्तरिक उडानमात्र भए पनि सवारी पार्किङ शुल्कदर पहिलेको विमानस्थलभन्दा तेब्बर बुझाउनु परेपछि सेवाग्राही आक्रोशित बनेका हुन् ।

यो पनि पढ्नुहोस

पोखरा अन्तर्राष्ट्रिय विमानस्थलमा ठेक्काबिनै पार्किङमा अचाक्ली असुली

पोखरा अन्तर्राष्ट्रिय विमानस्थल सञ्चालनमा आएसँगै पुरानो पोखरा विमानस्थलको तुलनामा किन तेब्बर बढ्यो त पार्किङ शुल्क ?

सबै सेवाग्राहीको चासोको विषय बनेको यसबारे जानकारी पाउन नेपाल नागरिक उड्ड्यन प्राधिकरणको विमानस्थल सेवा शुल्क नियमावली २०७८ हेर्नुपर्छ । सोही नियमावलीको नियम ७ बमोजिम पोखरा अन्तर्राष्ट्रिय विमानस्थलको सवारी साधन बिसान (पार्किङ) शुल्क निर्धारण भएको हो ।

नेपाल सरकार मन्त्रिपरिषद्को चैत ३० गते बसेको बैठकले नेपाल नागरिक उड्ड्यन प्राधिकरणको विमानस्थल सेवा शुल्क नियमावली २०७८ पास गरेको थियो । नियमावलीमा विमानस्थलअनुसार कहाँ कति पार्किङ शुल्क उठाउने भन्ने उल्लेख छैन । शुल्कका लागि प्रािधकरणले नै तोक्न पाउने उल्लेख छ ।

उक्त नियमावलीको नियम ७ मा भनिएको छ, ‘विमानस्थल प्रमुखले निर्धारण गरेको सवारी साधन बिसान क्षेत्रमा सवारी साधन बिसान गरेवापत प्राधिकरणले निर्धारण गरेबमोजिमको सवारी साधन विसान शुल्क लाग्नेछ ।’

सोही नियमअनुसार नै प्राधिकरणले काठमाडौंको त्रिभुवन अन्तर्राष्ट्रिय विमानस्थल, पोखरा र गौतम बुद्ध अन्तर्राष्ट्रिय विमानस्थलको छुट्टाछुट्टै भाडामा निर्धारण गरेको थियो । जसअनुसार त्रिभुवन विमानस्थलको एउटा र बाँकी रहेका पोखरा र गौतमबुद्ध विमानस्थलको समान सवारी पार्किङ शुल्क निर्धारण गरेको छ ।

पोखरा अन्तर्राष्ट्रिय विमानस्थलका राजश्व अधिकृत देवराज सुवेदी भन्छन्, ‘हामी कर्मचारीले प्राधिकरणले दिएको परिपत्र लागू गरेकोमात्रै हो ।’

प्राधिकरणले त्रिभुवन विमानस्थलको तुलनामा पोखरा र गौतमबुद्ध विमानस्थलको सवारी पार्किङ भाडा दर केही कम राख्न परिपत्र गरेको थियो । उक्त परिपत्रमा पोखरा र गौतम बुद्ध विमानस्थलको पार्किङ शुल्क दर समान तोकिएको छ ।

पोखरामा अन्तर्राष्ट्रिय उडान कहिलेबाट सुरु हुन्छ भन्ने अन्योल नै छ । तर, विमानस्थल सञ्चालन आएसँगै पार्किङ शुल्क उठाउन भने सुरु गरिएको छ । जसको जिम्मा मनोज निर्माण सेवाले पाएको छ ।

विमानस्थलमा बिना ठेक्का प्रक्रिया नै मनोज निर्माण सेवाले महंगो पार्किङ शुल्क उठाइरहेको छ र आइतबारमात्रै गोरखापत्रमा प्रकाशन गरी पार्किङ शुल्क उठाउनका लागि ठेक्का आह्वान गरिएको छ ।

सूचनामा ५ वर्षका लागि १ करोड ६२ लाख ३३ हजार रुपैयाँ न्युनतम बोलकबोल रकम तोकिएको छ । बहाल रकममा हरेक २ वर्षमा १० प्रतिशतले वृद्धि हुनेसमेत सूचनामा उल्लेख छ ।

बिना ठेक्का नै पोखरा अन्तर्राष्ट्रिय विमानस्थलमा पार्किङ शुल्क उठाइरहेको मनोज निर्माण सेवाले पुराना पोखरा विमानस्थलमा समेत पार्किङ शुल्क उठाउँदै आएको थियो । प्रक्रियागत रुपमा जाँदा लामो समय लाग्ने भएकाले तत्कालका लागि पार्किङ व्यवस्थापन गर्न मनोज निर्माण कम्पनीलाई नै अल्पकालीन स्वीकृति दिइएको विमानस्थलको तर्क छ ।

‘अहिले नयाँ एअरपोर्टमा ठेक्का प्रक्रियाबिना नै मनोजलाई पार्किङ शुल्क उठाउन किन दिइएको भन्ने प्रश्न जायज नै हो’, राजश्व अधिकृत सुवेदीले भने, ‘तर, बढेको शुल्कबारे हामीलाई दोष दिनु जायज होइन । मन्त्रिपरिषद्कै निर्णय पालनामात्रै गरेको हो ।’

त्रिभुवन विमानस्थलको पार्किङ शुल्क

पोखरा गौतमवुद्ध विमानस्थलको पार्किङ शुल्क