लिग टु : लयमा रहेको नेपाल र संघर्ष गरिरहेको यूएई खेल्दै, सन्दीप पनि खेल्ने

१८ फागुन, काठमाडौं । आईसीसी क्रिकेट विश्वकप लिग टु अन्तर्गत यूएईमा भइरहेको शृङ्खलाको आफ्नो दोस्रो खेलमा नेपालले आज घरेलु टोली यूएईसँग खेल्दैछ ।

खेल दुबई इन्टरनेशनल क्रिकेट स्टेडियममा नेपाली समयअनुसार बिहान ११:४५ बजे सुरु हुनेछ ।

नेपालले लिग टु मा लगातार पाँच खेल जित्दै कीर्तिमान बनाएर उच्च लयमा छ । शृङ्खलाको पहिलो खेलमा नेपालले पपुवा न्यु गिनीलाई पराजित गरेको थियो ।

यूएई भने पपुवा न्य गिनीसँग १३१ रनको फराकिलो रन अन्तरले पराजित गरेको थियो । त्यसअघि नामिबियाविरुद्धको दुई खेलमा यूएईले एक खेल मात्र जितेको थियो ।

सिधा हेर्दा अहिले नेपालले लगातार पाँच खेल जितेर लयमा छ । यूएई भने पछिल्ला खेलहरुमा संघर्ष गरिरहेको छ । लिग टु को पछिल्ला १० खेलमा यूएईले ६ खेल हारेको छ ।

नेपाल आफ्नो लयलाई कायम राख्दै यूएईविरुद्ध खेल जित्ने लक्ष्यमा हुनेछ । उता यूएई पुनरागमन गर्ने लक्ष्यमा हुनेछ ।

लिग टु को शीर्ष तीनमा पुग्नै आगामी जुनमा जिम्बावेमा हुने विश्वकप छनोट खेल्ने लक्ष्यमा रहेको नेपाल र यूएई दुवैलाई आजको खेल उत्तिकै महत्वपूर्ण छ । दुवैले समान ७ खेल खेल्न बाँकी छ ।

हाल तेस्रो स्थानमा रहेको नामिबिया जसको ३९ अंक छ उसलाई पछि पार्दै तेस्रो स्थानमा रहन नेपाल र यूएईले बाँकी ७ मध्ये ६ खेल जित्नैपर्ने अवस्था छ ।

त्यसैले आजको खेल जित्दै ओडीआई मान्यता जोगाउने र शीर्ष तीनको यात्रालाई कायम राख्ने लक्ष्यमा नेपाल छ

नेपालले लिग टु को शीर्ष पाँचमा रहेर ओडीआई मान्यता जोगाउन ७ मध्ये ४ खेल जित्नैपर्नेछ ।

नेपालले लिग टु मा दोस्रो पटक यूएईसँग खेल्न लागेको छ । लिग टु मा नेपालले यसअघि यूएईलाई हराएको छैन ।

गत मार्चमा यूएईमै भएको लिग टु को दुवै खेलमा नेपाल पराजित भएको थियो । कम लक्ष्य पछ्याउँदा पनि नेपाल यूएईविरुद्ध पहिलो खेलमा ४८ रन र दोस्रो खेलमा ९९ रनले पराजित भएको थियो ।

नेपालले यूएईसँग पछिल्लो पटक घरेलु मैदान कीर्तिपुरमै तीन खेलको ओडीआई शृङ्खला खेल्दै २-१ ले जितेको थियो ।

पहिलो खेलमा पराजित भए पनि नेपालले पुनरागमन गर्दै त्यसपछिका दुई खेल लगातार जितेर शृङ्खला कब्जा गरेको थियो । पहिलो खेलमा नेपाल यूएईसँग ८४ रनले पराजित भएको थियो । तर त्यसपछि नेपालले दोस्रो खेल ३ विकेट र तेस्रो खेल ६ विकेटले जितेको थियो ।

समग्रमा नेपालले यूएईसँग ९ खेल खेल्दा ४ खेल जितेको छ भने ५ खेलमा पराजित भएको छ ।

मोन्टी देसाइको आगमनपछि हयाप्पी ड्रेसिङ रुम मन्त्रसहित आत्मविश्वासी बनेको नेपाली टिमको ब्याटिङ लय अहिले राम्रो देखिएको छ ।

आवश्यक परेको बेला जुनै खेलाडीले पनि जिम्मेवारी लिँदै प्रदर्शन गरिरहेका छन् । अघिल्लो खेलमा पपुवा न्यु गिनीविरुद्ध कुशल भुर्तेलले अर्धशतक बनाएका थिए । अर्धशतकबाट चुके पनि आसिफ शेखले ४४ रन जोडेका थिए ।

यस्तै बलिङमा गुल्शन झाले करियरकै उत्कृष्ट प्रदर्शन गर्दै ३ विकेट लिएका थिए । लेफ्ट आर्म फास्ट बलर प्रतिश जिसीले त्यही खेलबाट नेपालको सिनियर टिममा डेब्यु गरे ।

चार फास्टर खेलाएको नेपालका लागि सोमपाल कामी र करण केसीले नयाँ बलमा राम्रो बलिङ गरेका थिए । यस्तै टिममा पुनरागमन गरेका आरिफ शेखले पनि राम्रो प्रदर्शन गरे ।

सर्वोच्च अदलातले विदेश जान अनुमति दिएपछि स्पीनर सन्दीप लामिछाने पनि टिममा फर्किएका छन् । उनी बुधबारै यूएई गइसकेका छन् ।

पहिलो पटक राष्ट्रिय टिममा स्थान बनाएका श्याम ढकालको घाइते भएकोले उनकैको स्थानमा सन्दीपलाई राखिएको छ । जसले गर्दा नेपालको स्पीन डिपार्टमा फाइदा पुग्नेछ ।

केही समयअघि घरेलु मैदानमा भएको शृखंलामा सन्दीपले चार खेलमा १३ विकेट लिएका थिए । सन्दीपले पहिलो रोजाइमा खेलेमा नेपालले तीन फास्टर बलर खेलाउनेछ ।

पहिलो खेलमा पपुवा न्यु गिनीसँगको लय कायम राख्दै यूएईविरुद्ध २ अंक जोड्ने लक्ष्यमा नेपाल छ ।

नेपाल-यूएईको हेड टु हेड

खेल : ९

नेपाल विजयी : ४

युएई विजयी : ५

नेपाल युएई खेलको नतिजा

एसिया कप छनोट २०१८ अगस्ट : यूएई ७८ रनले विजयी

नेपाल टुर टु यूएई २०१९ जनवरी : यूएई ३ विकेटले विजयी

नेपाल टुर टु यूएई २०१९ जनवरी : नेपाल १४५ रनले विजयी

नेपाल टुर टु यूएई २०१९ जनवरी : नेपाल ४ विकेटले विजयी

क्रिकेट विश्वकप लिग टु २०२२ मार्च : यूएई ४८ रनले विजयी