पदम लिम्बुलाई शहीद घोषणा गर्नुपर्ने परिवारको अडान

१६ चैत, विराटनगर । बेलबारी नगरपालिका–२, लालभित्तीमा पर्छ पदम लिम्बुको घर । यही चैत ५ गते विराटनगरमा भएको पहिचानको आन्दोलनका क्रममा घाइते उनको मृत्यु भएपछि शव धरानस्थित बीपी कोइराला स्वास्थ्य विज्ञान प्रतिष्ठानमा राखिएको छ ।

लालभित्तीस्थित पदमको घरमा मानिसहरुको आउजाउ बाक्लिएको छ । उनीहरुले सोध्ने अनेकखाले प्रश्न र राख्ने प्रस्तावले परिवारमा शोकमाथि तनाव थपिएका छ ।

‘बुबाआमाले एक्लो छोरो र हामीले माइती गुमाएका छौं’, पदमकी बहिनी पवित्राले भनिन्, ‘त्यसमाथि दिनदिनै मानिसहरु आएर के-के भन्छन् के-के । जसले जे भनेपनि दाजुलाई शहीद घोषणा नगरे हामी मान्दैनौं, शव पनि बुझ्दैनौं ।’

घरमा आउने सबैलाई लिम्बु परिवारको एउटै भनाइ छ– सरकारले शहीद घोषणा गर्नुपर्छ र पदमको छोराको भविष्यको जिम्मेवारी लिनुपर्छ ।

मैदानमा छानबिन समिति

गत चैत ५ गते पहिचान पक्षधरको आन्दोलनमा घाइते भएका पदम लिम्बुको १० चैतमा धरानमा उपचारका क्रममा मृत्यु भएको थियो । घटनाबारे छानबिन गर्न संघीय सरकारले गठन गरेको समितिले सोमबारदेखि काम सुरु गरेको छ ।

समितिमा सदस्य रहेका मोरङका सहायक प्रमुख जिल्ला अधिकारी शरद पोखरेलले मृतकको परिवारलाई भेटेर सरकारको तर्फबाट समवेदना व्यक्त गरेको बताए ।

‘विभिन्न दलका नेता र बीपी स्वास्थ विज्ञान प्रतिष्ठानका सम्बन्धित अधिकारी र चिकित्सकहरुलाई पनि भेटेर छलफल गरेका छौं’, उनले भने, ‘समितिले आफ्नो काम गरिरहेको छ ।’

शव पोष्टमार्टम गर्ने छानबिन समितिको प्रस्ताव मृतकको परिवार, आफन्त र राजनीतिक दलका प्रतिनिधिहरुले अस्वीकार गरेका छन् । उनीहरुले परिवारको माग सम्बोधन भएपछि मात्र पोष्टमार्टम गर्नपर्ने अडान राखेका छन् ।

पहिचान पक्षधर आन्दोलनमा मृत्यु भएका लिम्बुलाई प्रदेश सरकारले तत्काल तीन लाख रुपैंयाँ क्षतिपूर्ति दिने निर्णय गरेको छ, जसलाई लिम्बु परिवारले अस्वीकार गरेको छ ।

‘हाम्रो परिवारमाथि बज्रपात भएको छ, उहाँहरुले तीन लाख लिएर बस भन्न मिल्छ ?’, बहिनी पवित्राले प्रश्न गरिन्, ‘नेपाल सरकारले पहिला दाजुलाई विधिवत शहीद घोषणा गरोस्, त्यसपछि बाँकी छलफल हुन्छ ।’