कारबाही फुकुवा भएपछि विकास कोइरालाले भने- पार्टीले ढिला न्याय दियो

१९ चैत, चितवन। झण्डैं १० वर्ष पार्टीको कारबाहीमा परेका कांग्रेस चितवन पूर्वजिल्ला सभापति विकास कोइरालालाई आइतवार आज मात्रै कांग्रेस कार्य सम्पादन समितिले कारबाही फुकुवा गर्ने निर्णय गर्‍यो ।

कांग्रेस चितवन भित्र बलियो पकड रहेका नेता कोइराला २०७० सालको संविधान सभा निर्वाचनमा चितवनका तत्कालिन क्षेत्र नं. ४ बाट पार्टी केन्द्रीय सभापति सुशील कोइरालाकाविरुद्ध बागी उम्मेदवारी दिएपछि कारबाहीमा परेका थिए ।

कारबाही फुकुवाको माग गर्दै आएका कोइरालाले फुकुवा भएको खबर सामाजिक सञ्जाल र समाचारहरुबाट थाहा पाएको बताए । यसलाई सकारात्मक रुपमा लिएको नेता कोइरालाको भनाईं छ । आफ्नो निरन्तरको खबरदारी, पार्टी नेता कार्यकर्ताहरुको दवावमा परेर मात्रै निर्वाचनको मुखमा कारबाही फुकुवा भएको नेता कोइरालाले बताए ।

‘मैले कारबाही हुन्छ ६ बर्ष पार्टीभन्दा बाहिर भइन्छ भनेर थाहा पाउँदा पाउँदै उम्मेदवारी दिएको हो, विधानमा ६ बर्ष भन्ने छ,’ कोइरालाले भने, ‘तर विभिन्न कारणले मलाई थप ४ वर्ष यत्तिकै कारबाही गरेर राखियो ।’

पार्टीभन्दा बाहिर भएपनि खास विषेश अवस्थामा पार्टीका अभियानहरुमा साथ दिँदै आएको र कांग्रेसबाट विचलित पनि नभएको कोइरालाले बताए ।

उनले पार्टीले आगामी दिनमा कस्तो भूमिका दिन्छ सोही अनुसारको जिम्मेवारी पूरा गर्ने बताए ।

आफू सरहका नेता पार्टीको महामन्त्री भएको भन्दै नेता कोइरालाले मागेर भन्दा पनि लडेर भूमिका लिने बताए । गत मंसिरको निर्वाचन अगाडि कोइरालाले कारबाही फुकुवाका लागि दवाव दिन भन्दै पत्रकार सम्मेलन गरेका थिए ।

*समाचारमा यसअघि भुलवश गलत तस्वीर प्रयोग भएकामा क्षमाप्रार्थी छौं ।