३० चैत, डोटी । डोटीको दिपायल सिलगढी नगरपालिका– ५ बालश्रम मुक्त वडा घोषणा भएको छ ।
आगामी आर्थिक वर्षभित्र बालश्रम मुक्त नगर घोषणा गर्ने लक्ष्यका साथ २०७५ सालदेखि बालश्रम मुक्त अभियान सञ्चालन गरिरहेको नगरपालिकाले बुधबार एक समारोहकाबीच बालश्रम मुक्त वडा घोषणा गरेको हो ।
बालश्रम मुक्त वडा घोषणा गर्दै जिल्ला समन्वय समिति डोटीका प्रमुख लक्ष्मणबहादुर सिंहले बालबालिकालाई श्रममा लगाउनु कानुनी रुपमा दण्डनीय र सामाजिक निन्दनीय भएको बताए । नगरपालिकाभित्र अझै पनि बाल श्रमिकहरु रहेको हुन सक्ने बताउदै सिंहले प्रभावकारी अनुगमन हुनुपर्ने बताए ।
दिपायल सिलगढी नगरपालिकाका प्रमुख बाजीसिं खड्काले नगरपालिकालाई बालश्रम मुक्त बनाउने अभियान प्राथमिकताका साथ अघि बढाइएको बताए । उनले बालश्रम मुक्त गर्ने अभियानमा सहयोग गर्ने सबैलाई धन्यवादसमेत दिए ।
बालश्रम निवारण राष्ट्रिय रणनीतिले तोकेका सूचकहरु पूरा भएपछि वडालाई बालश्रम मुक्त घोषणा गरिएको नगरपालिकाका सामाजिक विकास अधिकृत रमेशचन्द्र जोशीले जानकारी दिए । उनले उक्त वडामा रहेका ६ जना श्रमिक बालबालिकाहरुलाई नगरपालिकाले सबै खर्च व्यहोर्ने गरी आवासीय विद्यालयमा भर्ना गरिएको बताए ।
थप तीन वडालाई यसै आर्थिक बर्षमा बालश्रम मुक्त घोषणा गर्ने तयारी भएको जोशी बताउँछन् । उनले भने, ‘आगामी आर्थिक वर्षभित्र नगरपालिकालाई बालश्रम मुक्त वडा घोषणा गर्ने लक्ष्य लिएका छौं ।’
प्रतिक्रिया 4