नयाँवर्षमा नदुखुन् मनहरु

लथालिंग छ भताभुंग छ

जताततै शरीरमा

घाउ लागेको छ

कता दुख्यो भनुँ खै ?

नदुखेको ठाउँ नै नभेटेपछि

समयले बिर्सिएको

भव्य सुख र समृद्धिको सपना

थन्किएका छन् फाइलहरूमा

मिसिएका छन् स्वार्थको रसवरीसँगै

वार्ता र सहमतिको टेबुलमा

परिकार बन्दैछन् झुटो अभियानको

अनि

डकार्छ असहमति र

घुमाउँछ घडीको उल्टो सुई

फर्काउँछ त्यही यात्रा

जहाँबाट सुरु भएको हो

परिवर्तन र विकासको नयाँ सिद्धान्त

वा समयलाई नै झुक्याउने

खुशी छन् अनुयायीहरू

पाउने पनि र नपाउने पनि

उब्जिंदैनन् प्रश्नहरू

कुनै मष्तिष्कमा

विरोधका स्वरहरू हराइरहेछन्

पानीजस्तै दूधमा

सुशासन सदाचार

खै कसको गोजीमा छन् ?

निस्किनै मान्दैनन्

रमाउँछन् मात्रै बन्द कोठामा

रक्सी र रुपैयाँका दास बनेर

सेवा गर्दैछन् मालिकहरूको

यो वर्ष यस्तै भयो

अब

नयाँ वर्षको पहिलो घामले

रंगाओस् सुख शान्ति र उमंगको धरातल

ब्युँझिउन् निदाएका चेतनाहरू

निस्किउन् बाहिर सुशासन र सदाचार

उज्यालो दुनियाँमा

मेलमिलाप र भातृत्वको साझा गीतमा

नाचुन् सयौंथरी मुजुरहरू

बनाइयोस् एकताको विशाल आँगन

सबै अटाउने

भ्रष्टाचारले नगनाओस्

सेवा प्रवाहको चूल्हो

सहमतिको भागवण्डाले

नछुटोस् यात्रा बीचमै

नपोखिउन् पसिना

अरबको तातो बालुवामा

नदुखुन् मनहरू

दु:खद् समाचारहरू सुनेर

भर्न नपरोस् पीआरको कुनै फारम

यही धूलो यही माटो

यही हावा यही पानी

यही संस्कृति

बगोस् नसा-नसामा

नयाँवर्षको हार्दिक मंगलमय शुभकामना ।।