विदेश पढ्न जानुलाई नकारात्मक नमानौं : मनिष झा

१७ वैशाख, काठमाडौं । प्रतिनिधिसभा सदस्य मनिष झाले उच्च शिक्षा अध्ययनका लागि विद्यार्थी विदेश जाने विषयलाई नराकात्मक रुपमा लिन नहुने बताएका छन् ।

नेपाल शैक्षिक परामर्श संघ इक्यानसँगको सहकार्यमा वानअपले आइतबार काठमाडौंमा आयोजना गरेको उच्च शिक्षा सम्बन्धी अन्तर्क्रिया कार्यक्रम ‘एडुक्लेभ’मा आफ्ना भनाइ राख्दै सांसद झाले वैदेशिक शिक्षा आर्जन गर्ने कुरालाई खर्चका रुपमा नभई लगानीका रुपमा लिनुपर्ने बताए ।

‘वैदेशिक शिक्षाका लागि नेपालबाट जाने विद्यार्थीहरूको क्रम बढ्दो छ । त्यसकारण बाहिरको शिक्षालाई विरोध भन्दा पनि सदुपयोग कसरी गर्ने भन्ने कुरा महत्वपूर्ण हो’, फ्याक्ट्स नेपालका संस्थापक समेत रहेका सांसद झाले कार्यक्रममा भने ।

विदेशमा अध्ययन गरेर स्वदेश फर्किएकाहरुले नेपाली समाजमा उल्लेख्य योगदान पुर्‍याएको भुल्नु नहुने उनको भनाइ छ ।

विश्व नै एउटा गाउँ जस्तो भएका बेला विद्यार्थीलाई विदेश पढ्न नजाऊ वा विदेश पढ्न जाँदा पैसा बाहिरियो भन्नु व्यावहारिक नहुने सांसद झाले बताए ।

‘नेपालमा अभिभावकहरूमा सन्तान हुर्काउँदा र शिक्षा आर्जनका लागि बाहिर पठाउँदा स्पष्ट उद्देश्य हुनुपर्छ,’ उनले भने, ‘बाहिर पढ्न गएर उतै हराउँछन् भन्ने हुँदैन । स्वदेश फर्किएर योगदान गर्ने, पेशा–व्यवसाय गर्ने पनि उत्तिकै छन् । रेमिट्यास भित्र्याउने उनीहरु नै हुन् ।’

नेपालबाट उच्च शिक्षाका लागि पछिल्लो समय युरोप, अमेरिका, अष्ट्रेलिया, क्यानाडा, जापान लगायतका विभिन्न देशमा नेपाली विद्यार्थी जाने गरेका छन् ।

उच्च शिक्षाका लागि विदेशिनेहरुको तथ्यांक समेत राख्दै सांसद झाले विदेश पढ्न जानेहरुलाई उच्च शिक्षा, ज्ञान र सीप आर्जन गरेपछि स्वदेश फर्काउने वातावरण बनाउनेतर्फ राज्यको ध्यान जानुपर्नेमा जोड दिए ।