स्पोर्ट्स ओडिसाको जितमा रेखाको गोल

२६ वैशाख, काठमाडौं । नेपाली राष्ट्रिय महिला फुटबल टिमकी सदस्य रेखा पौडेलको भारतीय महिला लिगमा स्पोर्ट्स ओडिसाको जितमा गोल गरेकी छन् ।

रेखा र रितु देवीको गोलमा स्पोर्ट्स ओडिसाले मंगलबार बिहान इस्ट बंगाल एफसीलाई २-१ ले हरायो । लिगमा रेखाको यो चौथो गोल हो ।

रेखाले यसअघि होप्स विरुद्ध एक तथा कहानी विरुद्ध दुई गोल गरेकी थिइन् ।

अहमदावादस्थित शाइवग पुलिस स्टेडियममा भएको खेलमा रेखाले ६०औं मिनेटमा गोल गर्दै स्पोर्ट्स ओडिसालाई अग्रता दिलाएकी थिइन् ।

इस्ट बंगालकी मौसमी मुर्मुले ६३औं मिनेटमा बराबरी गोल फर्काइन् । तर इन्जुरी टाइमको चौथो मिनेटमा रितु देवीले गोल गरेपछि स्पोर्ट्स ओडिसाले ३ अंक जोडेको हो ।

चौथो जितपछि ६ खेलबा६ १२ अंक जोड्दै स्पोर्ट्स ओडिसा दोस्रो स्थानमा उक्लेको छ र शीर्ष चनरमा रहेर क्वाटरफाइनल खेल्ने सम्भावना बलियो बनाएको छ ।

नेपाली गोल मेसिन सावित्रा भण्डारी सम्मिलित गोकुलम केरला १३ अंकसहित शीर्ष स्थानमा छ । गोकुलम केरलाले आज माता रुकुमनीसँग खेल्दैछ ।