अफगानिस्तानसँगका बाँकी खेलमा लिटन दासले बंगलादेशको कप्तानी गर्ने

२२ असार, काठमाडौं । अफगानिस्तान विरुद्धका बाँकी एक दिवसीय खेलमा बंगलादेशको कप्तानी लिटन दासले गर्ने भएका छन् ।

यसअघिका कप्तान तमिम इकवालले आकास्मिक रुपमा अन्तर्राष्ट्रिय क्रिकेटबाट बिहीबार सन्यास घोषणा गरेपछि लिटन दासलाई बंगलादेशले कप्तान नियुक्त गरेको हो ।

बंगलादेशको लागि कार्यवाहक कप्तानी गरिसकेका लिटन अफगानिस्तान विरुद्धको शृखंलाअघि उपकप्तान थिए ।

तीन खेलको ओडीआई शृखंलाको पहिलो खेलमा बंगलादेश अफगानिस्तानसँग डीएलएस मेथडमा १७ रनले पराजित भएको थियो । त्यसको भोलिपल्टै तमिमले सन्यास घोषणा गरेका हुन् ।

बंगलादेशको क्रिकेट बोर्डले लिटनलाई अफगानिस्तानसँगको शृखंलाको बाँकी दुई खेलका लागि कप्तान दिइएको क्रिकइन्फोले उल्लेख गरेको छ ।

शकिब अल हसन ओडीआईमा नयाँ कप्तान बन्ने होडमा अगाडि छन् ।

विश्वकप सुरु हुनु तीन माहिना मात्र बाँकी रहेको अवस्थामा तमिमले बिहीबार तत्कालका लागि लागु हुनेगरी सबैखाले अन्तर्राष्ट्रिय क्रिकेटबाट सन्यास घोषणा गरेका थिए ।

गत डिसेम्बरमा तमिम चोटका कारण बाहिर रहेपछि भारत भ्रमणमा लिटनले कप्तानी गरेका थिए । जसमा तीन खेलको शृखंला बंगलादेशले २-१ ले जितेको थियो ।

यस्तै शकिब औंलाको चोटका कारण बाहिर हुँदा अफगानिस्तान विरुद्ध लिटनले टेष्ट टिमको समेत कप्तानी गरेका थिए । उक्त खेलमा बंगलादेश विजयी भएको थियो ।

बंगलादेश र अफगानिस्तानबीचको दोस्रो ओडीआई शनिबार हुनेछ ।