बिहीबार नै रिलिज भए ‘ऐंचोपैंचो’ र ‘गणपति’

काठमाडौं । जनैपूर्णिमा एवं रक्षाबन्धनको दिन बिहीबार दुई नेपाली फिल्म ‘ऐंचोपैंचो’ र ‘गणपति’ रिलिज भएका छन् । बक्स अफिसमा विदेशीको दबदबा रहँदा यी दुईसामु घरेलु फिल्मलाई लयमा फर्काउनुपर्ने चुनौती छ ।

कृषा चौलागाईंको डेब्यु निर्देशन रहेको फिल्म ‘ऐंचोपैंचो’लाई सोसल ड्रामा जनरामा राखिएको छ । राजनीतिले समाज र परिवारमा पार्ने असरको कथामा आधारित यो फिल्ममा स्वस्तिमा खड्का, मुकुन भुसाल, वर्षा राउत र सुशील सिटौलाको शीर्ष भूमिका छ । ‘ऐंचोपैंचो’लाई केन्द्रीय चलचित्र जाँच समितिले युनिभर्सल प्रमाणपत्र दिएको छ भने यसको लम्बाइ १२६ मिनेट तय छ ।

बिहीबार नै अर्को नेपाली फिल्म ‘गणपति’ पनि रिलिज भएको छ । सविन अधिकारी निर्देशित फिल्ममा मुकुन भुसाल, मेनुका प्रधान, प्रकाश घिमिरे र राजाराम पौडेलको प्रमुख अभिनय छ ।

सोसल ड्रामा र कमेडी जनरामा राखिएको यो फिल्मको लम्बाइ १४२ मिनेट छ । जन्मिंदा भगवानको रुपमा जन्मिएको शीर्ष पात्रलाई कसरी समाजले भगवान बन्न दिंदैन भन्ने कथावस्तुमा फिल्म घुमेको छ । बिहीबार एकैदिन मुकुनका दुई फिल्म रिलिज भएका हुन् । हलहरुले यी दुई फिल्मलाई अपेक्षाभन्दा न्यून शो दिएका छन् ।