हाइड्रो टुरिजमको सम्भावना खोज्दै इप्पान र रैथाने

२१ असोज, काठमाडौं । जलविद्युत् आयोजना निर्माण गर्दा कर्मचारी आवासका लागि बनाइएका ‘क्याम्प हाउस’लाई होमस्टेमा परिणत गर्दै हाइड्रो टुरिजमको सम्भावनाका विषयमा छलफल भएको छ ।

स्वतन्त्र ऊर्जा उत्पादकहरुको संस्था, नेपाल (इप्पान) र रैथाने एग्री प्रोडक्टस प्रालिले शनिबार आयोजना गरेको कार्यक्रममा नेपालमा हाइड्रो टुरिजमको प्रवर्द्धनका लागि आयोजनाका क्याम्प हाउसलाई होमस्टेमा परिणत गर्न सकिने विषयमा छलफल भएको हो ।

कार्यक्रममा बोल्दै इप्पान अध्यक्ष गणेश कार्कीले देश बनाउने हो भने ऊर्जा र पर्यटनलाई नै अघि बढाउनुपर्ने भन्दै दुवै विषय एकै ठाउँमा जोड्ने विषयमा इप्पानले सहयोग गर्ने बताए ।

नर्वेले आयोजनाको बिजुली बेचेर भन्दा बढी टुरिजमबाट कमाइरहेको भन्दै नेपालमा पनि विभिन्न नदी करिडोरका आयोजनामा टुरिजम डेस्टिनेसन नै बनाएर काम गर्न सकिने उनको भनाइ थियो ।

‘कति ठाउँमा सोलार आयोजना छन्, त्यहाँ रैथाने कृषि गर्न सकिन्छ । जलविद्युत् आयोजना बनाउँदा धेरै आवास बनाएका हुन्छौं, आयोजना सकिएपछि सस्तोमा सामान बेच्ने वा नस्ट गर्ने काम भइरहेको छ । हाइड्रो टुरिजमका लागि मिलेर काम गर्ने हो भने अब त्यसलाई होमस्टेमा परिणत गर्न सकिन्छ,’ कार्कीले भने ।

पूर्वराजदूत उदय पाण्डेले आयोजनाको अध्ययन गर्दा नै ‘हाइड्रो टुरिजम’को योजना बनाउन सके नेपालमा पनि हाइड्रो टुरिजमबाट राम्रो आम्दानी गर्न सकिने बताए ।

नेपाल पर्यटन र हाइड्रोपावर दुवैको लागि निकै राम्रो सम्भावना भएको देश भएकाले हाइड्रो र टुरिजम जोडिदा यसले झनै धेरै राम्रो सन्देश दिने पाण्डेको भनाइ थियो ।

रैथाने एग्री प्रोडक्ट्स प्रालिका अध्यक्ष तिलक ढकालले बिजुलीका लागि मात्र बनाइएको कुलेखानी जलाशययुक्त आयोजना अहिले गतिलो ‘टुरिस्ट डेस्टिनेसन’ भएको उदाहरण दिँदै टुरिजमका हिसाबले नै योजनाबद्ध रुपमा बनाएको भए नेपालमा पनि हाइड्रो टुरिजमबाट निकै राम्रो आम्दानी गर्न सकिने बताए ।

उनले हाइड्रो टुरिजमले सबैभन्दा धेरै स्थानीय रैथाने उत्पादनलाई खपत गर्न सक्ने भएकाले इप्पानसँग सहकार्य गर्न चाहेको बताए ।

इप्पानका महासचिव बलराम खतिवडाले जलविद्युत् आयोजनाको निर्माण चरणमा धेरै आवास बनाउनुपर्ने र सञ्चालनमा आएपछि केही आवास मात्रै प्रयोगमा आउने हुँदा अव बनिसकेका त्यस्ता अवासलाई होमस्टेमा परिणत गर्न सकिने बताए ।

इप्पानका सदस्य टीएन आचार्यले लाख र करोडबाट नभइ हजारबाट सुरु गरेर नै नेपालमा केही गर्न सकिन्छ भन्ने हो भने हाइड्रो टुरिजम र रैथाने उत्पादन निकै राम्रो अवसर हुने बताए ।

नेपालमै केही गरौ भन्ने सोचका साथ सुरु भएको रैथाने अहिले राष्ट्रिय अभियान भइसकेको अब एउटा टिम बनाएर रैथाने उत्पादनलाई कसरी बजार सँग जोड्ने ? भन्ने विषयमा काम गर्न आफ्नो कम्पनीले रामेछापमा बनाइरहेको आयोजनाबाटै काम सुरु गर्न चाहेको उनले बताए ।

बागमती प्रदेश सभा सदस्य प्रेम भक्त महर्जनले प्रदेश सरकारले कृषिमा फरक किसिमको बजेट ल्याउन खोजेको बताउँदै किसानलाई हेर्ने दृष्टिकोणमा पनि परिवर्तन हुनु पर्ने बताए । कृषि, पर्यटन र हाइड्रोपावर जोडिनु सुखद् कुरा भएको उनको भनाइ थियो ।

कार्यक्रममा इप्पानका तर्फबाट कार्यसमिति सदस्य इन्जिनियर मिथुन पौडेल र रैथानेका तर्फबाट तिलक ढकालले कार्यपत्र प्रस्तुत गरेका थिए ।

इप्पान देशभरका करिब ५०० वटा जलविद्युत् आयोजनाको प्रतिनिधि संस्था हो । इप्पानसँग आवद्ध १६० भन्दा धेरै विद्युत् आयोजनाबाट २ हजार मेगावाट विद्युत् उत्पादन भइरहेको छ ।