डेंगु लागेका शुभमन गिलले अफगानिस्तानसँगको खेल पनि गुमाउने

२२ असोज, काठमाडौं । भारतीय क्रिकेट टिमका ओपनर ब्याटर शुभमन गिलले डेंगुका कारण विश्वकपको दोस्रो खेल पनि गुमाउने भएका छन् ।

चेन्नईमा भारतले अष्ट्रेलियालाई ६ विकेटले हराएको खेल उनले डेंगु संक्रमणका कारण खेल्न सकेका थिएनन् । उनको स्थानमा इशान किसनले टिममा ओपनरको रुपमा खेलेका थिए ।

शुभमन दोस्रो खेलमा टिममा सँग दिल्ली नगएको भारतीय क्रिकेट टिमको अफिसियल फेसबुक ह्यान्डलबाट जानकारी दिइएको छ ।

उनी दोस्रो खेलका लागि टिमसँग दिल्ली गएका छैनन् । उनी पहिलो खेलमा पनि टिमसँग मैदान गएका थिएनन् ।

भारतीय टिमका प्रमुख प्रशिक्षक राहुल द्रविडका अनुसार उनको स्थिति सुधार भइरहेको छ र उनी मेडिकल टिमको निगरानीमा रहेका छन् ।