वैदेशिक रोजगारीमा रहेकालाई २१ कात्तिकदेखि हिमालयन रि–इन्स्योरेन्सको आईपीओ

३ कात्तिक, काठमाडौं । हिमालयन रि–इन्स्योरेन्स लिमिटेडले २१ कात्तिकदेखि प्राथमिक सेयर (आईपीओ) निष्कासन गर्ने भएको छ । कम्पनीले पहिलो चरणमा नेपाल सरकारको सम्बन्धित निकायबाट श्रम स्वीकृती प्राप्त गरी विदेशमा बसी रोजगार गरिरहेका नेपालीहरुका लागि आईपीओ निष्कासन गर्न लागेको हो ।

कम्पनीले नेपाल धितोपत्र बोर्डबाट हाल कायम जारी पुँजी १० अर्ब रुपैयाँको ३० प्रतिशतले हुने ३ अर्ब रुपैयाँ बराबरको ३ करोड कित्ता सेयर प्रिमियम मूल्यमा निष्कासन गर्ने अनुमति प्राप्त गरेको थियो । जसमध्ये पहिलो चरणमा कम्पनीले वैदेशिक रोजगारीमा रहेका नेपालीहरुका लागि धितोपत्र निष्कासन तथा बाँडफाँट निर्देशिका अनुसार सार्वजनिक निष्कासनका लागि स्वीकृति पाएको सेयरको १० प्रतिशतले हुने ३० लाख कित्ता सेयर निष्कासन गर्न लागेको हो ।

यस्तै कम्पनीमा कार्यरत कर्मचारीहरुका लागि ६ लाख कित्ता र सामूहिक लगानी कोषका लागि १५ लाख कित्ता सेयर निष्कासन गर्न लागेको छ । यसरी निष्कासन गरी बाँकी रहेको २ लाख ४९ हजार कित्ता सेयर दोस्रो चरणमा सर्वसाधारणलाई निष्कासन हुनेछ । वैदेशिक रोजगारीमा रहेका, कर्मचारी र सामूहिक लगानी कोषलाई छुट्याएको सेयर बिक्री नभएमा उक्त सेयर पनि थप गरी सर्वसाधारणलाई निष्कासन हुनेछ ।

कम्पनीले प्रतिसेयर १०० रुपैयाँ अंकित मूल्यमा १०६ रुपैयाँ प्रिमियम थप गरी प्रतिकित्ता २०६ रुपैयाँमामा आईपीओ निष्कासन गर्न लागेको हो । कम्पनीको आईपीओमा न्यूनतम १० कित्ताका लागि आवेदन दिनु पर्नेछ भने अधिकतम ३ लाख कित्तासम्म आवेदन दिन सकिनेछ । कम्पनीको आईपीओमा वैदेशिक रोजगारीमा रहेका नेपालीहरुले ५ मंसिरसम्म आवेदन दिन सक्नेछन् ।

कम्पनीले आईपीओ निष्कासनका लागि गराएको रेटिङमा इक्रा नेपालले ‘इक्रा एनपी इस्यूअर रेटिङ ए’ प्रदान गरेको छ । यसले कम्पनीको वित्तीय दायित्व बहन गर्ने क्षमता पर्याप्त रुपमा सुरक्षित रहेको संकेत गर्दछ ।

आईपीओ निष्कासनका लागि कम्पनीले धितोपत्र निष्कासन तथा बिक्री प्रबन्धकमा एनएमबि क्यापिटल लिमिटेड नियुक्त गरेको छ ।  कम्पनीको आईपीओमा नेपाल धितोपत्र बोर्डबाट स्वीकृति प्राप्त गरेका सम्पूर्ण आस्वा सदस्य बैंक तथा वित्तीय र  सिडिएस एण्ड क्लियरिङ लिमिटेडको सफ्टवेयर ‘मेरो सेयर’ मार्फत् आवेदन दिन सक्नेछन् ।

हिमालयन रि–इन्स्योरेन्स नेपालमा खुलेको दोस्रो पुनर्बीमा हो भने पूर्णरुपमा निजी क्षेत्रको लगानी रहेको पहिलो पुनर्बीमा कम्पनी हो । कम्पनीको संस्थापक सेयरधनीमा नेपालको व्यवसायिक घरानाहरु छन् । सञ्चालक समितिको अध्यक्षमा नेपाल उद्योग वाणिज्य महासंघका निवर्तमान अध्यक्ष शेखर गोल्छा छन् ।