६ कात्तिक, काठमाडौं । त्रिकोणात्मक टी–२० क्रिकेट सिरिज अन्तर्गत यूएई विरुद्धको खेलमा नेपालले पाँचौ विकेट झारेको छ ।
पाँचौं विकेटको रुपमा वृत्य अरविन्द आउट भए । उनलाई अभिनास बोहराले बोल्ड आउट गरे । अरविन्द ४५ रन बनाएर पेभेलियन फर्किए ।
चौथो विकेट कुशल मल्लले हात पारेका थिए । उनको बलमा अलिशान शराफू रनआउट भए । वृत्य अरविन्द एउटा एण्डमा पुगे र तर शराफू त्यहीँ रहे र ९ रनमा रनआउट भए ।
त्यसअघि गुल्शन झाको बलमा आसिफ खान आउट भएका थिए । गुल्शनले सोमपाल कामीको हातबाट खानलाई क्याचआउट गराएका हुन् । खानले १८ रन बनाए ।
त्यसअघि सोमपालले २ विकेट लिएका थिए । पहिलो ओभरको अन्तिम बलमा पहिलो विकेट लिएका सोमपालले २.४ ओभरमा दोस्रो विकेट लिएका थिए । यूएईका कप्तान मोहम्मद वासिमलाई गुल्शन झाबाट क्याचआउट गराएका सोमपालले त्यसअघि यूएईका खालिद शाहलाई पहिलो ओभरको अन्तिम बलमा बोल्ड गरेका थिए ।
यूएईका कप्तान वासिम ८ रनमा र खालिद तीन चौकासहित १२ रनमा आउट भए ।
मुलपानी क्रिकेट मैदानमा टस जितेर नेपालले फिल्डिङ गरिरहेको छ । नेपालले यसअघि युएईलाई पहिलो खेलमा ७ विकेटले हराएको थियो ।
हङकङ पनि सम्मिलित सिरिजमा नेपाल लगातार तीन खेल जित्दै एक खेल अगावै फाइनल प्रवेश गरिसकेको छ ।
प्रतिक्रिया 4