काठमाडौं महानगरले मागेको ७१ प्रधानाध्यापक पदमा १५० आवेदन

८ मंसिर, काठमाडौं। काठमाडौं महानगरपालिकाले मागेको ७१ प्रधानाध्यापक पदमा १५० वटा आवेदन परेको छ ।

महानगरले माग गरेको आधारभूत तह (१-५) ६ वटा पदको लागि ११ वटा, आधारभूत तह (१-८) २२ पदको लागि ३१ वटा र माध्यामिक तहको ४३ पदको लागि १०८ वटा गरी जम्मा १५० आवेदन परेको हो ।

तर तत्काल खुला प्रतिस्पर्धाबाट सामुदायिक विद्यालयमा प्रधानाध्यापक नियुक्ति नगर्न काठमाडौं महानगरलाई उच्च अदालत पाटनले अन्तरिम आदेश दिएको छ । उच्च अदालत पाटनका न्यायाधीश श्यामजी प्रधानको एकल इजलासले उक्त आदेश जारी गरेको हो ।

खुला प्रतिस्पर्धाबाट प्रअ नियुक्ति गर्न लागेको भन्दै परेको मुद्दामा उच्च अदालत पाटनले  ‘नियम कार्यान्वयन नगर्न’ अन्तरिम आदेश जारी गरेको हो । महानगरका मेयर बालेन्द्र साहले खुला प्रतिस्पर्धाबाट प्रअ नियुक्ति गर्न कार्यविधि नै तयार पारेका थिए । अदालतको आदेशसँगै मुद्दाको अन्तिम टुंगो नलागेसम्म खुलाबाट प्रअ नियुक्ति गर्ने बाटो रोकिएको छ ।

महानगरपालिकाले खुला प्रतिस्पर्धाबाट करारमा पाँच वर्षको लागि प्रधानाध्यापक नियुक्ति गर्ने भन्दै १७ कात्तिकमा दरखास्त आह्वान गरेको थियो ।

कात्तिक मसान्तसम्म आवेदन माग गरेपछि बीचमा परेको चाडका कारण निवेदकहरुको अनुरोधमा ७ मंसिरसम्म आवेदन समायवधि थप गरिएको महानगरका शिक्षा अधिकृत इन्द्रप्रसाद दाहालले जानकारी दिए ।

अदालतबाट अन्तरिम आदेश आएकोबारे प्रश्‍नमा उनले भने, ‘ उक्त आदेश हामीकहाँ आइपुगेको छैन। उजुरी परेको भन्‍नेबारेमा पनि जानकारी पनि छैन।  हामी मंसिरभित्र सबै काम सकेर छनौट भएका प्रधानाध्यापहरुलाई नियुक्ति दिने कार्यायोजना छ ।’

महानगर शिक्षा विभागले १३ मंसिरभित्र आवेदक शिक्षकहरुलाई विद्यालय विकास योजना पेश गर्ने समयवधि तोकेको छ ।

महानगरले गठन गरेको विज्ञ टोलीले उनीहरुको विकास योजना सुन्ने, सेवा अवधि लगायत शिक्षा नियमावली अनुसार मूल्याङ्कन गरेको आधारमा नतिजा सार्वजनिक गर्ने र नियुक्ति गर्ने काम सकिने गरी तयारी भइरहेको महानगरका शिक्षा अधिकृत दाहालले बताए ।

महानगरले ११ स्रोत शिक्षक पदको लागि माग गरेको दरखास्तमा ४० वटा आवेदन परेको छ ।

महानगरले अंग्रेजी २ जना, नेपाली २ जना, गणितमा ३ जना, सामाजिकमा २ जना र विज्ञान विषयको स्रोत शिक्षकमा २ जना गरी ११ पदको लागि दरखास्त आह्वान गरेको थियो ।

महानगरले स्रोत शिक्षकको लागि काठमाडौं महानगरपालिकाको स्रोत शिक्षक व्यवस्थापन कार्यविधि, २०८० बमोजिम १८ मंसिरमा लिखित परीक्षा सञ्चालन गर्ने जनाएको छ ।