नेपाल सुपर लिग २०२३ : चितवन र ललितपुर दुवैलाई शीर्ष स्थानमा उक्लने अवसर

२४ मंसिर, काठमाडौं । नेपाल सुपर लिग २०२३ को शनिबार हुने खेलमा एफसी चितवनले सामना गर्दैछ, ललितपुर सिटी एफसीको । दशरथ रंगशालामा साँझ ५ बजे हुने यस खेलसँग जोडिएका तथ्यांक यस प्रकार छन् ।

१. यो यसपल्टको प्रतियोगिताको २० औं र समग्रमा ४५ औं खेल हुनेछ ।

२. ललितपुर चार खेलबाट छ अंकसहित चौथो स्थानमा छ । यो खेल जितेर ललितपुर अंक तालिकाको शीर्षमा उक्लन सक्छ ।

३. अहिलेसम्म अपराजित ललितपुरले एक जित र तीन बराबरी खेलेको छ । बुटवल–लुम्बिनी एफसीलाई २–० ले हराएयता उसले लगातार तीन खेल बराबरी खेलेको छ । त्यसमा पोखरा थन्डर्स र धनगढी एफसीसँग गोलरहित तथा वीरगञ्ज युनाइटेडसँग २–२ को बराबरी रहेको छ ।

४. चितवनको चार खेलबाट पाँच अंक छ र पाँचौं स्थानमा छ । यो खेल जितेर चितवन पनि शीर्ष स्थानमा उक्लन सक्छ । यसका लागि उसलाई तीन गोल अन्तरको जित आवश्यक हुनेछ ।

५. चितवन पछिल्ला तीन खेलमा अपराजित छ । पोखराविरुद्धको पहिलो खेल १–० ले गुमाएको चितवनले त्यसपछि काठमाडौं रेजर्ससँग १–१ बराबरी खेलेको थियो । लगतै वीरगञ्जलाई २–१ ले हराएपछि बुटवल–लुम्बिनीसँग १–१ को बराबरीमा रोकिएको थियो ।

६. प्रतियोगिताको इतिहासमा चितवनका लागि ललितपुर पहिलो प्रतिद्वन्द्वी रहेको थियो । दुई टिमबीच अहिलेसम्म एउटा खेल मात्र भएको छ ।

७. वर्ष ०७८ को त्यो खेल १–१ को बराबरीमा टुंगेको थियो । ललितपुरले कमल श्रेष्ठको गोलले ४९ औं मिनेटमा अग्रता लिएको थियो । तर दोस्रो हाफको इन्ज्युरी समयको दोस्रो मिनेटमा अमित तामाङले चितवनका लागि पेनाल्टीबाट बराबरी गोल फर्काए ।

८. त्यसै खेलमा ललितपुरका लागि अञ्जन विष्ट २१ औं मिनेटमा पेनाल्टीमा गोल गर्न चुके । यो प्रतियोगिताकै पहिलो पेनाल्टीको निर्णय थियो र अञ्जन त्यसमा चुक्ने पहिलो खेलाडी पनि रहे ।