प्रधानमन्त्री कप महिला टी–२० प्रतियोगिता राउन्ड रोविन फर्म्याटमा हुने
२०८० मंसिर २७ गते १३:४४ 
२७ मंसिर, काठमाडौं । प्रधानमन्त्री कप महिला टी–२० क्रिकेट प्रतियोगिता राउन्ड रोविन फर्म्याटमा हुने भएको छ ।
पुस ५ गतेबाट काठमाडौंमा सुरु हुन लागेको प्रधानमन्त्री कप महिला टी–२० प्रतियोगिता राउन्ड रोविनका आधारमा हुने नेपाल क्रिकेट संघ क्यानका सचिव पारस खड्काले अनलाइनखबरलाई जानकारी दिएका हुन् ।
‘महिला प्रधानमन्त्री कप राउण्ड रोविन आधारमा हुनेछ । डिसेम्बर २१ बाट गर्ने तयारीमा छौँ । सबैले सबैसँग खेल्नेछ । त्यसपछि क्वालिफायर प्लेअफ शैलीमा खेलाउने तयारी छ । अब केही दिन भित्रै यसको आधिकारिक टाइसिट नै सार्वजनिक हुन्छ ।’
कतिपय प्रदेशले छनोट प्रतियोगिता सकेर टिम घोषणा गरिसकेका छन् भने कतिपयमा छनोट अन्तिम चरणमा रहेको छ ।
पहिलो पटक महिला प्रधानमन्त्री कप काठमाडौंमा हुन लागेको हो । यसअघि काठमाडौं बाहिर हुँदै आएको यस प्रतियोगितामा ८ टिमले सहभागिता जनाउने छन् ।
यस अघिको संस्करण इटहरीमा भएको थियो । २०२३ को संस्करणको उपाधि सुदूरपश्चिम प्रदेशले जितेको थियो ।
प्रतिक्रिया 4