कमिन्सलाई आईसीसी वर्ष सर्वोत्कृष्ट खेलाडी अवार्ड, कोहलीलाई ओडीआई उत्कृष्ट
२०८० माघ ११ गते १९:२९ 
११ माघ, काठमाडौं । अष्ट्रेलियाका कप्तान प्याट कमिन्सले आईसीसीले हरेक वर्ष प्रदान गर्ने सर्वोत्कृष्ट खेलाडीको अवार्ड जितेका छन् ।
आईसीसीले हरेक वर्ष प्रदान गर्ने सर्वाधिक ठूला अवार्ड सर गर्फिल्ड सोबर्स ट्रफी फर द क्रिकेटर अफ द इयर पुरुष २०२३ को अवार्ड कमिन्सले जितेको जनाएको छ । उनले ट्रविस हेड, भारतका विराट कोहली र रविन्द्र जडेजालाई पछि पार्दै उक्त अवार्ड जितेका छन् ।
गत नोभेम्बरमा अपराजित भारतलाई फाइनलमा ६ विकेटले हराउँदै एकदिवसीय विश्वकप उपाधि जित्न कमिन्सले शानदार कप्तानी र प्रदर्शन गरेका थिए ।
त्यस्तै भारतलाई नै टेस्ट च्याम्पियनसिप २०२३ को फाइनलमा हराउन र प्रतिष्ठित एसेज ट्रफी रक्षा गर्न उनले शानदार प्रदर्शन गरेका थिए ।
भारतका विराट कोहलीले ओडीआई वर्ष खेलाडीको अवार्ड जिते । कोहलीले विश्वकप २०२३ मा शानदार प्रदर्शन गरेका थिए ।
उनले विश्वकपमा मात्रै ११ खेलमा ३ शतक र ६ अर्धशतकसहित कुल ७६५ रन बनाएका थिए । कोहली विश्वकपको सर्वोत्कृष्ट खेलाडी चुनिएका थिए ।
एसोसिएट वर्ष उत्कृष्ट खेलाडीको अवार्ड नेदरल्यान्ड्सका बास डि लिडेले जितेका थिए ।
नेदरल्यान्डलाई विश्वकपमा पुर्याउन ग्लोबल छनोटमा उनले सानदार अलराउन्ड प्रदर्शन गरेका थिए ।
यसवर्ष नेपालबाट आईसीसीको कसैले पनि जित्न सकेनन् । गत वर्ष भने आसिफ शेखले स्प्रिट अफ द इयरको अवार्ड जितेका थिए ।
न्युजिल्यान्डका रचिन रविन्द्रले उदीयमान वर्ष खेलाडीको अवार्ड जित्न पुगे । त्यस्तै भारतका सूर्यकुमार यादवले टी-२० वर्ष खेलाडीको अवार्ड पाएका छन् ।
प्रतिक्रिया 4