२०८० फागुन २६ गते १९:१७ 
२७ फागुन, काठमाडौं । भारतमा भएको डब्लुआरएफ एसियाली र्याफ्टिङ च्याम्पियनसिपमा नेपालले स्वर्ण पदक जितेको जितेको छ ।
भारतको हिमाचल प्रदेशस्थित सिम्लामा भएको प्रतियोगितामा नेपालले आरएक्स (हेड टु हेड)मा भारतलाई नै पछि पार्दै स्वर्ण पदक जितेको हो । उक्त स्पर्धामा नेपालले १ सय २० अंक जोड्दै स्वर्ण पदक जितेको नेपाल र्याफ्टिङ एन्ड क्यानोइङ संघका अध्यक्ष राजीव श्रेष्ठले जनाएका छन् ।
अध्यक्ष श्रेष्ठका अनुसार एसियाली र्याफ्टिङमा नेपालले जितेको यो ऐतिहासिक पदक हो । नेपालबाट सविन गुरुङ, शक्तिकुमार गुरुङ, विजय गुरुङ, डम्बरबहादुर पुर्वाछाने र दीपेश पुन मगरले च्याम्पियनसिपमा प्रतिस्पर्धा गरेका थिए । यस्तै नेपाली टोलीको अफिसियलमा संघका कोषाध्यक्ष महेश थापा र प्रशिक्षकमा भीष्मराज थपलिया थिए ।
हेड टु हेडमा पहिलो भएको नेपाल स्लालममा ८० अंकसाथ तेस्रो हुँदै कांस्य जितेको संघका अध्यक्ष राजीव श्रेष्ठले जानकारी दिए । यस्तै डाउन रिभरमा भने ६० अंक जोडेको नेपाल चौथो भयो ।
स्लालम, डाउन रिभर र हेड टु हेड गरी तीन विधा समावेश प्रतियोगितामा नेपाल समग्रमा २६० अंक जोड्दै दोस्रो भयो । समग्रमा भारत बेल्गाउँ २७० अंकसाथ पहिलो तथा भारत राइभोला २४८ अंकसाथ तेश्रो स्थानमा रहे ।
विश्व र्याफ्टिङ महासंघको आयोजना तथा भारतीय र्याफ्टिङ फाउन्डेसनको तत्वावधानमा यही मार्च ३ देखि भएको प्रतियोगितामा नेपाल, भारत, इरान, ताजिकिस्तान, कजाखस्तान लगायत देशले प्रतिस्पर्धा गरेका थिए । महिलातर्फ भने इरानले वर्चस्व जमाउँदै तीनै इभेन्टमा स्वर्ण जित्यो ।
प्रतिक्रिया 4