अधिकांश महिलाको अनुहारमा हल्का रौं हुन्छ । तर जब यी रौं बाक्लो हुन थाल्छ वा दाह्री जस्तो देखिन थाल्छ । यो महिलाका लागि समस्याको कारण बन्छ । महिलाको अनुहारमा पलाएको रौंले आत्मविश्वास पनि कमजोर बनाउँछ ।
पोलिसिस्टिक ओभरी सिन्ड्रोम (पीसीओएस) रोगका कारण महिलाको अनुहारमा कपाल बढ्ने गर्छ । पीसीओएस हुँदा महिलाको अण्डाशय सुन्निन्छ । अण्डाशयमा सुन्निने, पानीको फोका आउने कारण महिलामा महिला हार्मोनको सन्तुलन बिग्रिन थाल्छ र तौल बढ्ने, अनुहारमा कपाल बढ्ने समस्या देखिन्छ ।
केही अवस्थामा महिलाको शरीरमा पुरुष हार्मोन अर्थात् एन्ड्रोजेन बढ्न थाल्छ । यसकारण पनि महिलाको अनुहार र शरीरका अन्य धेरै अंगहरुमा कपाल बढ्न थाल्छ । कतिपय अवस्थामा कुनै औषधिको सेवन पछि साइड इफेक्टको रूपमा अनुहारको कपाल बढ्न सक्छ ।
कपाल झर्ने समस्या भएका महिलाले कपाल उमार्नका लागि ‘मिनोक्सिडिल’ तेलको प्रयोग गर्छन् । त्यसको प्रयोगले अनुहारमा कपाल पलाउने हुन्छ । शरीरको तौल भएका महिलामा पनि अनुहारमा रौं पलाउने समस्या हुनसक्छ ।
के छ उपचार ?
महिलाको अनुहारमा रौं पलाउने समस्याका लागि दुईवटा उपचार सँगैसँगै गर्नुपर्छ । पहिले अनुहारमा रौं आउने मुख्य जड पत्ता लगाएर त्यसको उपचार गर्नुपर्छ ।
हार्मोनको गडबडीले रौं पलाएको हो कि, औषधिको साइड इफेक्टको कारण पलाएको हो वा अन्य कारणले पलाएको हो, त्यो पत्ता लगाएर त्यसको उपचार गरेपछि यो समस्या कम भएर जान्छ ।
हार्मोन गडबडीको कारण रौं पलाएको हो भने सम्बन्धित रोगको विशेषज्ञकहाँ गएर उपचार गर्नुपर्छ । त्यसपछि पलाइसकेको कपाल हटाउन लेजर गर्ने हो भने छालारोग विशेषज्ञसँग सल्लाह लिन सकिन्छ ।
पलाइसकेको रौंलाई हटाउन अस्थायी र स्थायी दुई प्रकारको उपाय छ । स्थायी रूपमा अटाउन लेजर हेयर रिमुभर गर्न सकिन्छ । यसले शतप्रतिशत रौंलाई स्थायी रूपमा हटाउन सक्दैन । यसले शरीरको ८० देखि ९० प्रतिशत रौंलाई हटाउँछ । यो प्रविधिबाट शरीरको सबै भागको अनावश्यक रौं हटाउन सकिन्छ । अस्थायी रूपमा हटाउन भने व्याक्स, रेजर प्रयोग गर्न सकिन्छ ।
स्थायी रूपमा अनुहारको रौं हटाउँदा केही साइड इफेक्ट पो देखापर्छ कि ?
लेजर हेयर रिमुभलको लागि अहिले अत्याधुनिक मेसिनहरू उपलब्ध छन् । जसको खासै साइड इफेक्ट हुँदैन । तर विशेषज्ञको सल्लाहबिना गर्दा भने छाला डढ्ने समस्या हुनसक्छ ।
लेजर हेयर रिमुभल गर्नुका फाइदा
लेजर हेयर रिमुभल सरल र पीडारहित प्रक्रिया हो । बिना कुनै दुखाइ अनावश्यक रौं हटाउन यो प्रक्रिया उपयोगी हुन्छ । यो प्रक्रियामार्फत रौं हटाउँदा वरपरको छालामा कम क्षति हुन्छ । यो प्रक्रिया केही खर्चिलो भए पनि जीवनभर थ्रेडिङ र वाक्सको तुलनामा सुलभ नै हुन्छ । शरीरको अनावश्यक रौं हट्दा आत्मविश्वास पनि बढ्छ ।
कति लाग्छ खर्च ?
कति रौं पलाएको छ र लेजर कति पटक गर्नुपर्छ त्यस आधारमा खर्च निर्धारण हुन्छ । सामान्यतया सात पटकसम्म लेजर गर्नुपर्ने हुन्छ र एक पटकमा चार हजारदेखि आठ हजारसम्म खर्च लाग्न सक्छ । कुल खर्च भने लगभग ४० देखि ४५ हजार रुपैयाँ लाग्न सक्छ ।
तस्वीर, भिडियो : आर्यन धिमाल/अनलाइनखबर
प्रतिक्रिया 4