कांग्रेस सांसदको प्रश्न : एसपी बढुवामा पहिलो नम्बरका डीएसपी किन परेनन् ?

१९ चैत, काठमाडौं । नेपाली कांग्रेसका सांसद अर्जुननरसिंह केसीले एसपीमा बढुवा हुँदा पहिलो नम्बरमा रहेका डीएसपी किन छुटेको भन्दै प्रश्न गरेका छन् ।

सोमबार प्रतिनिधि सभा बैठकको शून्य समयमा बोल्दै सांसद केसीले नेपाल प्रहरीका १२ जना प्रहरी नायव उपरीक्षक (डीएसपी)बाट ८ जना प्रहरी उपरीक्षक (एसपी)मा बढुवा हुँदा सत्तागठबन्धनको सिण्डिकेटका कारण एक नम्बरका डीएसपी छुटेको टिप्पणी गरेका हुन् ।

उनले भने, ‘वरिष्ठलाई पाखा पार्ने कामले सरकारको सुशासनको रटानको धज्जी उडेको छ ।’

हालै प्रहरी प्रधान कार्यालयले डीएसपीबाट एसपीमा गरेको बढुवामा १२ नम्बरका डीएसपी विनोद घिमिरे पर्दा पहिलो नम्बरका प्रदीप क्षेत्री छुटेका छन् । यसले सरकारको भनाइ र गराइमा ठूलो भिन्नता देखिएको उनले बताए ।