दिपेन्द्र ढुंगानाको फोटो किताब ‘प्यान्डामिक थ्रु द लेन्स’ सार्वजनिक

७ वैशाख, काठमाडौं । कोरोना महामारीको समयमा मुलुकले भोगेको त्रासदीमा खिचिएका तस्वीरहरूको संकलन ‘प्यान्डामिक थ्रु द लेन्स’ सार्वजनिक भएको छ ।

फोटो पत्रकार दिपेन्द्र ढुंगानाले कोरोनाको समयमा खिचेका तस्वीरहरूको संकलनमा त्रासदीका विभिन्न अवस्थाहरू समेटिएका छन् ।

किताबमा कोरोनाबाट संक्रमित भएकादेखि ज्यान गुमाएकासम्मको, संक्रमणबाट जोगिन हिंडेकादेखि जोगाउन हिंडेका सम्मको, उपचार गर्न अस्पतालमा भएकादेखि चिहानसम्मका दृश्यहरू छन् ।

९ वटा विधामा छुट्याइएका तस्वीरहरूलाई सरकारले संक्रमण नियन्त्रका लागि लगाएको कथा लकडाउन, सहरमा बस्न नसकेर घर जानेहरूको कथा मार्च टू होम, रोजगारी गुमाएका श्रमिकहरूको कथा प्लाइट अफ वर्कर्स समेटिएका छन् ।

त्यस्तै संक्रमितहरूको उपचारमा खटेका स्वास्थ्यकर्मी र अस्पतालहरूको कथा हस्पिटल एन्ड हेल्थ वर्कर, संक्रमणबाट ज्यान गुमाएका र तिनको व्यवस्थापनमा अनवरत खट्नेहरूको कथा डेड बडी म्यानेजमेन्ट छन् ।

कोरोनाकालमा सांस्कृतिक गतिविधिको कथा, आन्दोलन, फिल्डमा गएर काम गर्ने पत्रकार, सुरक्षाकर्मी, कर्मचारी लगायतका कथा र भ्याक्सिनका लागि झेल्नु परेको सास्तीलाई फोटोमा उतारिएको छ ।

फोटो पत्रकार ढुंगाना कोरोनाको समयमा आम मान्छेका भोगाइलाई इतिहासमा दस्तावेजीकरण गर्नका लागि तस्वीरलाई पुस्तकको रूप दिएको बताउँछन् ।

ढुंगाना भन्छन्, ‘त्यो समय कस्तो थियो भनेर भविष्यमा हेर्न सकिने भनेको तस्वीरमा नै हो । त्यसैले मैले यसलाई समयको दस्तावेजीकरणका लागि पुस्तकको रूप दिनुपर्छ भन्ने लाग्यो ।’ पुस्तकमा १२० वटा तस्वीर छन् ।