२०८१ वैशाख १९ गते १४:०० 
मोटोपनले अहिले धेरैलाई सताइरहेको छ । बदलिंदो जीवनशैली, असन्तुलित खानपान लगायत कारणले मोटोपन आम समस्या जस्तै बनिरहेको छ । अत्यधिक मात्रामा खानेकुरा खाँदा तौल बढ्ने गर्छ । तर शरीरमा पोषक तत्वको कमीका कारण समेत तौल बढ्न सक्छ ।
शरीरमा पोषक तत्वको कमी हुँदा मेटाबोलिज्मको प्रक्रियामा क्षति पुग्छ । कमजोर मेटाबोलिज्मका कारण तौल बढ्ने समस्या हुनसक्छ । साधारण भाषामा भन्दा हामीले खाएको खानालाई ऊर्जामा परिणत गर्ने प्रक्रिया नै मेटाबोलिज्म हो । खाएको खानालाई टुक्राउने र त्यसलाई नयाँ ऊर्जामा परिणत गर्ने काम पनि मेटाबोलिज्मले नै गर्छ । तौल नियन्त्रण गर्न मेटाबोलिज्मको महत्वपूर्ण भूमिका हुन्छ ।
भिटामिन डीको कमी
भिटामिन डीको कमी पनि मोटोपनको एक कारण हो । यसको कमी हुँदा शरीरको हार्मोनमा गडबडी हुन्छ, जसले मेटाबोलिज्मको कार्य सुस्त हुन पुग्छ । यसबाट हामीले खाएको खाना ऊर्जामा परिणत हुन सक्दैन र शरीरको तौल बढ्छ ।
आइरनको कमी
आइरनको कमीले रगतमा हेमोग्लोबिनको मात्रामा कमी हुन्छ । जसकारण शरीरमा पर्याप्त मात्रामा अक्सिजन पुग्न पाउँदैन र मेटाबोलिज्म सुस्त हुँदा तौल बढ्न सक्छ ।
भिटामिन बी १२ कमी
भिटामिन बी १२ को कमीले पाचन प्रक्रिया गडबड हुन्छ । जसकारण मेटाबोलिज्मसहित शरीरका धेरै कार्यमा असर पुग्छ र तौल बढाउन सक्छ । यसको कमी हुन नदिन दूध, दही, अण्डा, मासु, माछाका साथै फलफूल र सागपात खान सकिन्छ ।
आयोडिनको कमी
आयोडिनको कमीले थाइराइडको समस्या निम्त्याउन सक्छ । थाइराइड हार्मोनको सामान्य स्तर कायम राख्नाले मोटाबोलिज्मलाई ठीकसँग काम गर्न मद्दत गरेर तौललाई नियन्त्रणमा राख्न मद्दत गर्छ । यसको कमीले गलगाँड आउने, मानसिक क्षमतामा कमी, शारीरिक क्षमतामा कमी जस्ता असर देखिन्छन् ।
फोलेटको कमी
फोलेटको कमीले पनि तौल बढ्न सक्छ । फोलेटले शरीरमा रातो रक्तकोषिका र डीएनए बनाउँछ । रातो रक्तकोषिकामा हुने हेमोग्लोबिनले शरीरमा अक्सिजन प्रवाह गर्छ । यसको कमीले शरीरको ऊर्जा स्तर कम गर्न र मोटाबोलिज्म सुस्त बनाउने गर्छ । जसकारण शरीरमा तौल बढ्छ । फोलेटको कमीका कारण शरीरको क्रियाकलाप राम्रोसँग हुन पाउँदैन । फोलेटलाई भिटामिन बी ९ पनि भनिन्छ । फोलेटको कमीले थकान, कमजोरी, मुखभित्र घाउ आउने र स्मरणसँग सम्बन्धित समस्या देखिन थाल्छ ।
प्रतिक्रिया 4