![](https://www.onlinekhabar.com/wp-content/uploads/2024/05/Ed-Sheeran-and-Kapil-Sharma.jpg)
काठमाडौं । ग्रामी अवार्ड विजेता बेलायती गायक एड सिरन कपिल शर्माको नेटफ्लिक्स शो ‘द ग्रेट इण्डियन कपिल शर्मा शो’मा अतिथिको रुपमा सहभागी हुने भएका छन् । सार्वजनिक गरिएको नयाँ एपिसोडमा सिरन कपिलको उक्त शोमा पुगेको देखिएको छ ।
सिरनलाई स्वागत गर्दै कपिल भन्छन्– ‘तपाईं उमेरमा मभन्दा कान्छो तर अंग्रेजीमा म तपाईंभन्दा कान्छो हुँ ।’
प्रोमोको छोटो दृश्यमा एडले आफ्नो बहुचर्चित गीत ‘सेप अफ यु’लाई भारतीय टचमा गाउँदै गरेको देखिन्छ । यस बाहेक उनले बलिउड अभिनेता शाहरुख खानको आइकोनिक पोज रिक्रिएट गरेको पनि देखिन्छ ।
कपिलले प्रोमोमा सिरनलाई भनेका छन्- ‘मैले तपाईंको भिडियो हेरें, तपाईं शाहरुखको घरमा जानुभयो । उहाँलाई भेट्नुभयो ।’ जवाफमा सिरनले ‘दिलवाले दुल्हनियाले जाएंगे’को सदाबहार संवादमार्फत कपिलको बयानको जवाफ दिंदै भनेका छन्, ‘ठूला-ठूला सहरमा यस्ता साना-साना कुरा भइरहन्छन् ।’
दुई महिनाअघि पनि मुम्बई पुगेका गायक सिरनले केही बलिउड सेलिब्रेटीसँग पार्टी गरिरहेको देखिएको थियो । शाहरुखले आफ्नो इन्स्टाग्राममा सिरनसँगको भिडियो सेयर गरेका थिए । सो भिडियोमा शाहरुख आफ्नो सिग्नेचर पोजमा देखिएका थिए ।
सिरनको यो दोस्रो भारत भ्रमण हो । सन् २०१७ मा पनि भारतमा आएका सिरनले त्यतिबेला कन्सर्ट गरेका थिए । सिरनले सन् २०१६ मा ‘वर्षगीत’ र ‘बेस्ट पप सोलो पर्फमेन्स’ विधामा ग्रामी अवार्ड जितेका थिए ।
प्रतिक्रिया 4