कोशीमा निवर्तमान मुख्यमन्त्री केदार कार्कीले फिर्ता गरेनन् सरकारी निवास र गाडीको चाबी

१४ जेठ, विराटनगर । कोशी प्रदेशका निवर्तमान मुख्यमन्त्री केदार कार्कीले सरकारी निवासको तालाचाबी फिर्ता नगरेपछि मुख्यमन्त्री हिक्मतकुमार कार्की डेरामा बसिरहेका छन् ।

निवर्तमान मुख्यमन्त्रीले विराटनगर र काठमाडौँका रहेको मुख्यमन्त्रीको सरकारी निवासको तालाचाबी फिर्ता गरेका छैनन । दुई वटा निवाससँगै प्रदेश सरकारका तीन वटा सवारी साधन पनि उनीसँग छ । विशिष्ट व्यक्तिका लागि छुट्याइएको कार, अन्य दुई वटा कार र एउटा स्कुटर कार्कीले फिर्ता नगरेका हुन् ।

मुख्यमन्त्रीका सल्लाहकार रवि खनालका अनुसार मुख्यमन्त्री हिक्मतकुमार कार्की विराटनगरको पोखरीया स्कुल छेउ रेग्मी टोलमा रहेको भाडाको घरमा बसिरहेका छन् ।

कोशी प्रदेशमा सुनसरी मोरङ सिँचाइ आयोजनाको अतिथि गृृहलाई प्रदेशको मुख्यमन्त्रीको निवास बनाइएको छ । तत्कालिन मुख्यमन्त्री राजेन्द्र राईले आयोजनाको अतिथि गृहलाई निवास बनाएका थिए । त्यसपछिका मुख्यमन्त्री सोही निवासमा बस्छन् ।

२७ असोजमा संविधानको धारा १६८ को उपधारा ५ अनुसार मुख्यमन्त्री बनेका केदार कार्की पनि सोही निवासमा बसे । २६ चैतमा एमाले र माओवादीले समर्थन फिर्ता लिएपछि अल्मतममा परेका उनले राजीनामा नदिएको र विश्वासको मत पनि नलिएको भन्दै २६ वैशाख २०८१ मा पदमुक्त गर्दै प्रदेश प्रमुख परशुराम खापुङले अर्को सरकार गठन आह्वान गरे । जसमा एमाले र माओवादी केन्द्रको समर्थनमा एमालेका हिक्मतकुमार कार्कीले दाबी पेश गरेपछि मुख्यमन्त्री नियुक्त भए ।

हिक्मत कार्कीको नियुक्तिविरुद्ध निवर्तमान मुख्यमन्त्री केदार कार्कीले सर्वोच्च अदालतमा रिट दिएका छन् र यो मुद्दामा १६ जेठमा पेशी तोकिएको छ ।

आइतबार प्रदेशसभा बैठकमा विशेष समय लिएर बोल्दै एमाले प्रमुख सचेतक रेवतीरमण भण्डारीले मुख्यमन्त्रीले सरकारी निवास र सवारी साधन फिर्ता नदिएको बताएका थिए । ‘निवर्तमान मुख्यमन्त्रीले आफू मुख्यमन्त्री हुँदा प्रयोग गरेको निवास चाबी लगाएर जानुभयो । काठमाडौँमा रहेको मुख्यमन्त्रीको निवासमा पनि चाबी लगाएर हिँड्नुभएको छ’, उनले भने,‘ सवारी साधनसमेत राख्नुभएको छ ।’

निवर्तमान मुख्यमन्त्री केदार कार्की भने आफूलाई पदमुक्त गरेको पत्र नआएका कारण निवास र सवारी फिर्ता नगरेको बताउँछन् । सर्वाेच्चमा सरकार गठनसम्बन्धी मुद्दा चलिरहेका कारण पनि उनले तालाचाबी नबुझाउका हुन् ।

निवास र सवारी आफूले प्रयोग नगरेको बताउँदै उनले भने,‘संविधानको धारा उल्लेख गरेर प्रदेश प्रमुखले मुख्यमन्त्रीबाट हटाएको चिट्ठी दिएको एक सेकेण्डमा मुख्यमन्त्री निवास खाली हुन्छ, गाडी पनि बुझाइदिन्छु ।’