सामाजिक सञ्जाल चलाउन सिकाउँदै पोखरा नगर युवा परिषद्

१७ जेठ, काठमाडौं । पोखरा महानगरपालिकाको नगर युवा परिषद्‌ले युवाहरुलाई सामाजिक सञ्जाल चलाउन सिकाउने भएको छ । शनिबार सामाजिक सञ्जाल सञ्चालन, चुनौती र सम्भावनाबारे १५० युवालाई अभिमुखीकरण कार्यक्रम गर्न लागिएको परिषद्‌का कार्यकारी उपाध्यक्ष सन्तोष न्यौपानेले दिए ।

सूचना प्रवाहमा सामाजिक सञ्जालको ठूलो योगदान भएपनि पछिल्लो समय भ्रामक खबरले बढी स्थान बनाइरहेकाले सामाजिक सञ्जालका फाइदा र बेफाइदाबारे युवाहरुसँगै चर्चा गरिने न्यौपानेले बताए । ‘आजको विज्ञान तथा प्रविधिको युगमा सामाजिक सञ्जाल सूचनाको मूलस्रोतका रुपमा अगाडि आइरहेको छ । सूचना नै शक्ति हो भन्ने प्रमाणित पनि हुँदै गएको छ’, उनले भने, ‘तर हामीले सामाजिक सञ्जालबाट पाइरहेको सूचना कतिको सत्य हो भन्ने मै अल्मलिरहेका छौं ।’

आजको समयमा युवाहरुको मानसिकता र दृष्टिकोण निर्माणमा सामाजिक सञ्जालले महत्वपूर्ण भूमिका खेलिरहेको बताउँदै परिषद्‌का कार्यकारी उपाध्यक्ष सन्तोष न्यौपानेले भने, ‘त्यसैले पनि हामी युवाहरु मिसइन्फर्मेसन र डिसइन्फर्मेसनबाट बच्न एकदमै चुनौती बढ्दै गएको छ ।’

कार्यक्रममा पत्रकार महासंघ कास्की अध्यक्ष विमला भण्डारी, जिल्ला प्रहरी कार्यालय कास्कीका डीएसपी वसन्तकुमार शर्मा र आईटीका जानकार विश्वजराज पौडेलले सामाजिक सञ्जाल प्रयोगबारे कुराकानी गर्नेछन् ।

‘अहिलेका अधिकांश आपराधिक घटना कहीं न कहीं सामाजिक सञ्जालसँग जोडिएका छन् । कतिपय जान्दाजान्दै पनि त्यसमा फसिरहेका हुन्छौं, सजायको भागिदार हुनुपरेको छ’, न्यौपानले भने, ‘साइबर क्राइमबाट कसरी बच्ने, पीडितले कहाँ कसरी न्‍याय खोज्ने भन्नेबारे चर्चा गर्नेछौं ।’