सरकारी अस्पतालका समस्या अध्ययन गर्न समिति गठन

१८ जेठ, काठमाडौं । स्वास्थ्य तथा जनसंख्यामन्त्री प्रदीप यादवले सरकारी अस्पतालमा भएका समस्या अध्ययन गर्न तीन सदस्यीय समिति गठन गरेका छन् ।

सरकारी अस्पतालमा बिरामीले समयमै उपचारका लागि पालो नपाएको र शल्यक्रियाका लागि वर्षौं पालो कुर्नुपर्नेलगायत अवस्था रहेकाले यी समस्यालाई हल गर्न समिति गठन भएको हो ।

स्वास्थ्य मन्त्रालयका प्रवक्ता डा. प्रकाश बुढाथोकीका अनुसार अतिरिक्त स्वास्थ्य सचिव डा. दीपेन्द्ररमण सिंहको संयोजकत्वमा गठित अध्ययन समितिमा डा. मदनकुमार उपाध्याय र वरिष्ठ जनस्वास्थ्य प्रशासक डा. गुणनिधि शर्मा सदस्य सचिव रहेका छन् ।

‘स्वास्थ्य मन्त्रालयको जिम्मेवारी सम्हालेसँगै उहाँले विभिन्न सरकारी अस्पतालको अनुगमन गर्नु भएको थियो । अस्पतालमा देखिएका समस्या र बिरामीले गरेको गुनासो सम्बोधन गर्न उहाँले समिति नै गठन गर्नु भएको हो,’ डा. बुढाथोकीले भने ।

प्रवक्ता बुढाथोकी अनुसार समितिले अध्ययन प्रतिवेदन २ हप्ताभित्र पेस गर्नुपर्नेछ । समितिले पहिलो चरणमा काठमाडौँ उपत्यका भित्रका संघीय अस्पतालहरूको स्थलगत अनुगमन गर्नेछ ।

‘अस्पतालमा शल्यक्रियाको लागि लामो समयसम्म पालो कुर्नुपर्ने अवस्था, रेफरको अवस्था, सेवाको गुणस्तर एवं प्रक्रिया लगायतका विषय सम्बन्धमा क–कसको जिम्मेवारीभित्र पर्ने, शल्यक्रिया सेवा दिने विशेषज्ञ चिकित्सकको संख्या र अस्पतालले दैनिक दिएको सेवाको बिवरण तयार गर्नपर्ने निर्देशन दिनुभएको छ,’ डा. बुढाथोकीले भने ।

यसैगरी अस्पतालमा बिरामीको चाप, जनशक्ति, साधनस्रोत एवं अन्य पूर्वाधारको अध्ययन गरी स्वास्थ्य सेवा समयमा नै एवं गुणस्तरीय रूपमा प्रवाह गर्न सुझाव पेस गर्ने जिम्मेवारी पनि समितिलाई छ ।

समस्याको प्रभावकारी व्यवस्थापनको लागि अल्पकालीन (३ महिनाभित्र गर्न सकिने), मध्यकालीन (१ आर्थिक वर्षभित्र गर्न सकिने) र दीर्घकालीन (५ वर्षभित्र गर्नुपर्ने) कार्ययोजना तयार गरी पेस गर्नसमेत मन्त्री यादवले समितिलाई निर्देशन दिएको डा. बुढाथोकीले जानकारी दिए ।

यो पनि पढ्नुहोस

पत्थरी निकाल्न पनि कुर्नुपर्छ ९ महिना