यूपीमा भाजपालाई झट्का, चलेन राम मन्दिरको रणनीति

२२ जेठ, काठमाडौं । भारतमा लोक सभा निर्वाचनको प्रारम्भिक रुझानमा सत्तारुढ भारतीय जनता पार्टी (भाजपा) नेतृत्वको एनडीए गठबन्धन र विपक्षी कांग्रेस नेतृत्वको इण्डिया गठबन्धनबीच रोचक प्रतिस्पर्धा भइरहेको छ ।

हालसम्मको रुझानले मत सर्वेक्षणको नतिजा नमिलेको देखिन्छ । विभिन्न टेलिभिजन च्यानल र न्युज एजेन्सीहरुले गरेको मत सर्वेक्षणमा भाजपा नेतृत्वको गठबन्धनले २८१ देखि ४०१ सिटसम्म ल्याउने देखाइएको थियो । यसैगरी विपक्षी गठबन्धनले १०७ देखि २०१ सिटसम्म ल्याउन सक्ने उल्लेख थियो ।

तर अहिलेसम्मको रुझानमा एनडीए गठबन्धन ३०० सिटसम्म पनि पुग्न नसक्ने जस्तो देखिएको भारतीय मिडियाहरुले उल्लेख गरेका छन् ।

भारतको निर्वाचन आयोगको पछिल्लो विवरण अनुसार हालसम्म भाजपा २३८ सिटमा अगाडि छ । विपक्षी इण्डिया गठबन्धन २०० सिटमा अगाडि छ । कांग्रेस ९९, समाजवादी पार्टी ३७, तृणमुल कांग्रेस ३२ र डिएमके २१ सिटमा अगाडि छन् ।
सन् २०१९ मा भाजपाले ३०३ सिट जितेको थियो ।

यूपीमा समाजवादी अगाडि

नेपालसँग जोडिएको उत्तर प्रदेश (यूपी) मै भाजपालाई समाजवादी पार्टीले पछि पारेको छ । उत्तर प्रदेशमा लोक सभाका ८० सिट छन् ।

अहिलेसम्मको मत गणनामा समाजवादी पार्टी अग्रस्थानमा छ । समाजवादी पार्टी ३६ सिटमा र उसको सहयोगी कांग्रेस उम्मेदवार ८ सिटमा अगाडि छन् ।

भाजपा जम्मा ३२ सिटमा अगाडि छ । राष्ट्रिय लोक दल २ सिटमा तथा कांशिराम नेतृत्वको आजाद समाज पार्टी र अपना दल पार्टी एक–एक सिटमा अगाडि छन् ।

उत्तर प्रदेशको अयोध्यामा गत जनवरीमा भाजपाले तामझामका साथ राम मन्दिर प्राण प्रतिष्ठा गरे पनि त्यसले काम नगरेको कतिपयले विश्लेषण गरिरहेका छन् । चुनावको केही महिना अगाडि मात्रै भएको यो भव्य अनुष्ठानको उदघाटन प्रधानमन्त्री नरेन्द्र मोदीले गरेका थिए । विश्लेषकहरुले चुनावमा भाजपालाई यसको फाइदा हुन सक्ने अनुमान गरे पनि जारी मत गणनाको रुझान भने विपरीत देखिएको छ ।

फैजाबाद सिटमा भाजपाका लल्लु सिंह यसपटक पछि परेका छन् । उनीभन्दा करिब १० हजार भोट अन्तरले समाजवादी पार्टीका अवधेश प्रसाद अगाडि छन् ।

सन् २०१४ मा भाजपाका लल्लु सिंहले समाजवादी पार्टीका मित्रसेन यादवलाई २ लाख ८२ हजार ७७५ मतको भारी अन्तरले हराएका थिए । सन् २०१९ मा पनि लल्लु सिंहले समाजवादी पार्टीकै उम्मेदवार आनन्द सिंहलाई ६५ हजारभन्दा बढी मत अन्तरले हराएका थिए । कांग्रेसका निर्मल खत्री तेस्रो भएका थिए ।

हरियाणाका १० सिटमध्ये भाजपा र कांग्रेस ५–५ सिटमा अगाडि छन् । सन् २०१९ मा हरियाणाका सबै १० सिट भाजपाले जितेको थियो ।