![](https://www.onlinekhabar.com/wp-content/uploads/2024/06/sakura-pokhara.jpg)
२४ जेठ, पोखरा । विश्व वातावरण दिवसका अवसरमा पोखरामा जापानी फूल साकुरा लगाइएको छ । जापान सहयोगमा निर्मित कोमागाने पार्क र बसुन्धारा पार्कमा बुधबार साकुरा प्रजातिको २३ बोट लगाइएको हो ।
पोखरा महानगरपालिकाका प्रमुख धनराज आचार्य, प्रमुख प्रशासकीय अधिकृत श्यामकृष्ण थापा, इन्स्टिच्युट अफ हिमालयन कन्जरभेसन (आइएचसी) र क्युटो युनिभर्सिटी जापानका प्रोफेसर पाक्या शुमा लगायतले पोखरा–जापानमैत्री पार्क ‘कोमागाने’मा २३ वटा साकुरा लगाएका हुन् । नजिकै रहेको बसुन्धारा पार्कमा पनि पोखरा-६ र मितेरी आमा समूहले २५ बोट साकुराका फूल लगाएका छन् ।
पोखरा जापान सम्बन्धलाई सुमधुर बनाउने उद्देश्यले पोखरा–जापान मैत्रीपार्क ‘कोमागाने’ मा जापानी राष्ट्रिय फूल ‘साकुरा’ लगाइएको नगरप्रमुख आचार्यले बताए । पोखराको हावापानीमा साकुरा फुल्ने प्राविधिक तथा वातावरणीय अध्ययन पश्चात् जापानबाट यो फूल ल्याइएको उनले सुनाए ।
फुल्दा सुन्दर देखिने साकुरा पोखरा–जापानको साइनोलाई थप मजबुत बनाउने सेतुका रूपमा आफूले लिइएको मेयर आचार्यको भनाइ थियो । साकुरा रोपेसँगै पोखरामा २ लाख २६ हजार बिरुवा रोप्ने ‘ग्रिन पोखरा, क्लिन पोखरा’को मेगा प्रोजेक्ट सुरु भएको घोषणासमेत गरे ।
उनले महानगर क्षेत्रमा सार्वजनिक स्थल, खुल्लाचौर तथा पाखा पखेरा, नदी तथा राजमार्ग किनार लगायत क्षेत्रमा विभिन्न प्रजातिका २ लाख २६ हजार बढी बिरुवाहरू लगाइने जानकारी दिए ।
जापानी प्रोफेसर शुमाले साकुरा हिमालयको काखमा फुल्ने सुन्दर फुलका रूपमा चित्रण गरे । उनले पोखरामा साकुरा रोपेसँगै साकुरा आफ्नो घर फर्किएको बताए।
जापानबाट १०० साकुराका बिरुवाहरू पोखरा ल्याइएको छ । केही बिरुवाहरू रोप्न बाँकी रहेको र उपयुक्त स्थानमा ती बिरुवाहरू लगाइने सहरी विकास, पर्यटन तथा वातावरण महाशाखा प्रमुख भरतराज पौडेलले बताए ।
साकुरालाई शान्तिको प्रतीक मानिन्छ । विश्वमा शान्ति, भ्रातृत्व र समृद्धिको सन्देश प्रवाह गर्न जापानले २३ देशका ३५ सहरमा साकुरा रोप्दै आएको छ ।
प्रतिक्रिया 4