प्रकाशमानको स्वास्थ्य सुधारोन्मुख

२४ जेठ, काठमाडौं । भारतको नयाँदिल्लीमा उपचार गराइरहेका नेपाली कांग्रेसका नेता प्रकाशमान सिंहको स्वास्थ्य सुधारोन्मुख रहेको उनको सचिवालयले जनाएको छ ।

मूत्रप्रणालीमा समस्या देखिएपछि नेपाली चिकित्सकको सिफारिसमा उनी नयाँदिल्ली गएका थिए । उनले सुरुमा बीर अस्पतालमा नियमित उपचार गराउँदै आएका थिए । पछि मेडिसिटी अस्पताल हुँदै उनी नयाँदिल्लीको गुणगाउँस्थित फोर्टिस् अस्पतालमा उपचारका लागि पुगेका थिए ।

२१ गते उनको अप्रेसन गरिएको र स्वास्थ्य सुधार भइरहेकाले डिस्चार्जको तयारी भइरहेको नयाँदिल्लीमा रहेका प्रकाशमानका सहयोगी यूपी लामिछानेले जानकारी दिए ।

सम्भवतः एक–दुई दिनमा डिस्चार्ज हुनुहुन्छ,’ लामिछानेले भने । डिस्चार्ज भएपछि पनि फलोअपको काम सकेर मात्र नेपाल फर्किने तयारी भइरहेको उनले बताए ।

प्रकाशमानको साथमा श्रीमती र छोराहरु पनि दिल्लीमा छन् ।