![](https://www.onlinekhabar.com/wp-content/uploads/2024/06/lekha-samiti-1-1024x466.jpg)
२५ जेठ, काठमाडौं । गिरीबन्धु टी–इस्टेटको विषय संसदीय समितिमा उठेको छ ।
शुक्रबार बसेको प्रतिनिधि सभाको सार्वजनिक लेखा समितिको बैठकमा कांग्रेस सांसदहरूले गिरीबन्धु टी–इस्टेटको विषयमा छलफलको माग राखेका हुन् ।
‘गिरीबन्धु टी–इस्टेटको विषय आएको छ । यसमा पनि छलफल आवश्यक छ,’ कांग्रेस सांसद राजेन्द्रकुमार केसीले भने । उनले गिरीबन्धु टी–इस्टेटको विषयमा के कसो भएको हो, त्यसको जानकारी सरकारसँग माग गर्नुपर्ने र त्यसआधारमा छलफल गर्नुपर्ने प्रस्ताव पनि राखेका छन् ।
झापाको गिरीबन्धु टी–इस्टेटको जग्गा कानुन बनाएर ३४३ बिघा १० कठ्ठा जग्गा अन्य ठाउँमा सट्टापट्टा गर्न सकिने बाटो खोलिएको थियो ।
२४ माघ २०८० मा सर्वोच्च अदालतको संवैधानिक इजलासले सरकारले दिएको उक्त स्वीकृति बदर गरिदिएको थियो । २०८१ वैशाख अन्तिम साता त्यसको पूर्णपाठ सार्वजनिक भयो । जसमा गिरीबन्धु टी–इस्टेटको जग्गा सट्टाको निर्णयलाई नीतिगत भ्रष्टाचार भनिएको छ ।
यससँगै कांग्रेसले गिरीबन्धु टी–इस्टेटको विषय निरन्तर उठाइरहेको छ ।
लेखा समितिको बैठक औपचारिक रूपमा सुरु नहुँदै कांग्रेस सांसद श्यामकुमार घिमिरेले गिरीबन्धु टी–इस्टेटको विषयमा के गर्ने हो भनेर समिति सभापति ऋषिकेश पोखरेलसँग कुरा राखेका थिए ।
‘सभापतिज्यू हामीले गिरीबन्धु टी–इस्टेटको विषयमा छलफल गर्नुपर्ने हो कि ?’ घिमिरेले भने ।
समिति सभापति पोखरेलले जवाफ फर्काए, ‘छलफल गर्नुपर्ने भए गरौंला के छ र ! मन्त्रीलाई नै बोलाउँला, निर्णय के भएको रहेछ मगाएर हेरौंला ।’
प्रतिक्रिया 4